ეუთოს მიერ საქართველოში დაგეგმილ საპარლამენტო არჩევნებთან დაკავშირებით გამოქვეყნებული ანგარიში შუალედური დოკუმენტია, - ამის შესახებ საპარლამენტო უმრავლესობის ლიდერმა ზვიად კვაჭანტირაძემ განაცხადა.
კვაჭანტირაძე აცხადებს რომ ანგარიში საგანგაშო არ არის რადგან ის მხოლოდ იმ შეხვედრებს ასახავს, რომელიც აპრილში თბილისში გაიმართა.
ამავდროულად კვაჭანტირაძე აცხდებს, რომ ანგარიში არ არის რეკომენდაციები ხელისუფლების მიმართ, ხოლო საბოლოო დასკვნის გამოქვეყნებამდე, რომელშიც რეკომენდაციები აისახება, ”ჯერ კიდევ დიდი დროა”.
”გამომდინარე იქედან, რომ მისიის წევრები შეხვდნენ ოპოზიციის ფართო სპექტრის წარმომადგენლებს, ამ შეხვედრების დროს კი ძირითადად ისმოდა ხელისუფლების აბსოლუტურად არაობიექტური კრიტიკა, რა თქმა უნდა, ეს ყველაფერი გადმოვიდა ქაღალდზე. ეს არის მხოლოდ ამ შეხვედრების ამსახველი დოკუმენტი. თქვენ იქ ვერ ნახავთ ვერც ერთ რეკომენდაციას ხელისუფლების მისამართით”, - განაცხადა კვაჭანტირაძემ.
მისივე განმარტებით, რეკომენდაციები ეუთოს საბოლოო დასკვნაში იქნება მოცემული.
შეგახსენებთ, ეუთომ საქართველოში დაგეგმილ საპარლამენტო არჩევნების საკითხზე ანგარიში გამოქვეყნა.
ანგარიშის თანახმად, საქართველოში ვიზიტის დროს, შეხვედრებზე „გამოითქვა განსაკუთრებული შეშფოთება წინასაარჩენო კამპანიის ჩატარების გამო, განსაკუთრებით კი იმის გამო, რომ კონკურენტ ძალებსა და ამომრჩეველზე შესაძლოა განხორციელდეს ზეწოლა, ასევე ადმინისტრაციული რესურსების ბოროტად გამოყენების პოტენციური რისკის გამო“.
ანგარიშში აღნიშნულია, რომ საქართველომ არ შეასრულა ეუთო-ს დემოკრატიული ინსტიტუტებისა და ადამიანის უფლებათა ოფისის ბოლო რეკომენდაციები, რომელიც წინასაარჩევნო კამპანიისა და არჩევნების ჩატარებას ეხებოდა.
