ირლანდიაში საქართველოს საელჩოს ორგანიზებით, ირლანდიის ეროვნულ საკონცერტო დარბაზში საქართველოს დამოუკიდებლობის აღდგენის 25 წლისთავისადმი მიძღვნილი კონცერტი და საზეიმო მიღება გაიმართა.
კონცერტზე მაყურებლის წინაშე „ქართული ხმები", ცნობილი ირლანდიელი მომღერალი ჯეკ ლუკმანი და ირლანდიაში მოქმედი ქართული ხალხური სიმღერების ბავშვთა ანსამბლი „Mixed Melodies" წარსდგა. მაყურებლის განსაკუთრებული დაინტერესება „ქართული ხმების' მიერ შესრულებულმა ქართულმა ხალხურმა სიმღერებმა გამოიწვია.
ღონისძიების ფარგლებში ასევე მოეწყო საქართველოს ბუნების, კულტურის, სხვადასხვა ქალაქებისა და ღირსშესანიშნაობების ამსახველი ფოტო გამოფენა.
ღონისძიებაზე დამსწრე საზოგადოებას მისასალმებელი სიტყვით მიმართა ირლანდიაში საქართველოს საქმეთა დროებითმა რწმუნებულმა გიორგი ზურაბაშვილმა.
კონცერტის დასრულების შემდეგ გაიმართა ოფიციალური მიღება, სადაც სტუმრებმა დააგემოვნეს ქართული ღვინო და კერძები. კონცერტსა და სადღესასწაულო მიღებას 200-ზე მეტი სტუმარი დაესწრო, მათ შორის იყვნენ ირლანდიის მთავრობისა და პარლამენტის, ბიზნესის, კულტურის, პრესის და სამეცნიერო წრეების, ასევე ირლანდიაში აკრედიტებული დიპლომატიური კორპუსისა და ქართული დიასპორის წარმომადგენლები
