რეგიონული განვითარებისა და ინფრასტრუქტურის მინისტრის ნოდარ ჯავახიშვილის განმარტებით, ბიძინა ივანიშვილი წინასაარჩევნო პროცესში ჩაერთვება, როგორც ქვეყანაზე შეყვარებული ადამიანი.
„რაში სჭირდება ბიძინა ივანიშვილს სტატუსი? - საქართველოს მოქალაქე თავის ქვეყანაზე შეყვარებული, რომელსაც უზარმაზარი ამაგი აქვს ზოგადად ქართული სახელმწიფოს, მისი ისტორიის თუ კულტურის ძეგლების აღდგენა-შენარჩუნების ნაწილში და ასევე იმაში, რომ დღეს ჩვენ ხელისუფლება გვქვია. გაიკითხეთ მოსახლეობაში, თუ ვინმე ეკითხება ბატონ ბიძინას, თქვენ რა თანამდებობა გაქვთო, თუ არ გაქვთ არ შეგხვდებითო, სტატუსი ძალიან ბევრ რიგ ადამიანს სჭირდება. დანარჩენ შემთხვევაში აქ პიროვნება მუშაობს და არა თანამდებობა“, - განაცხადა ჯავახიშვილმა.
ყოფილი პრემიერ-მინისტრი ბიძინა ივანიშვილი წინასაარჩევნო კამპანიაში აქტიურად ჩაერთვება და ყველა რეგიონში ჩასვლას გეგმავს. ამის შესახებ ივანიშვილი დღეს გამოქნეყნებულ ღია წერილში საუბრობს.
,,სწორი არჩევანის შედეგად 2012 წელს ჩვენ მოვიპოვეთ თავისუფლება! სწორ არჩევანს დღესაც სასიცოცხლო მნიშვნელობა აქვს ჩვენთვის! დღესაც ჩვენი ისტორიული გამოცდილების და ალღოს იმედი მაქვს! ამიტომ დავწერე ეს წერილი. ამიტომაც ვგეგმავ წინასაარჩევნო პერიოდში ყველა რეგიონში ჩასვლას და ტელევიზიით გამოსვლებს. შევხვდები საზოგადოებას, ვისაუბრებ ქვეყნის წინაშე არსებულ კონკრეტულ ამოცანებზე, ვუპასუხებ ჟურნალისტების და ფეისბუქმომხმარებლთა დასმულ კითხვებს მთავრობის საქმიანობის, ეკონომიკის მდგომარეობის, პოლიტიკურ პარტიების, მედიის და ყველა იმ მთავარი საკითხის შესახებ, რისი გათვალისწინებითაც უნდა გავაკეთოთ პოლიტიკური არჩევანი”, - აცხადებს ყოფილი პრემიერი.
მისივე თქმით, გამოიყენებს მთელ რესურსს იმისთვის, რომ,, ერთიანი ნაციონალური მოძრაობა“ ხელისუფლებაში არ დაბრუნდეს.
