თბილისში საქართველოს თავდაცვისა და უსაფრთხოების მე-10 კონფერენცია მიმდინარეობს. დილიდან ერთ-ერთი გამომსვლელი იყო საგარეო საქმეთა მინისტრი, რომელმაც განმარტება მედიისთვის გააკეთა ვიზალიბერალიზაციის პროცესზე.
როგორც ცნობილია, გუშინ ევროპულ საბჭოში მოხდა განხილვა ამ პროცესის, რომელშიც ევროკავშირის წევრი ქვეყნების ელჩები მონაწილეობდნენ, გადაწყვეტილება ამ ეტაპზე არ მიღებულა.
მიხეილ ჯანელიძემ განმარტა პროცედურები თუ რა არის საჭირო იმისთვის, რომ საქართველოს მოქალაქეებმა ევროპაში უვიზო მიმოსვლით ისარგებლონ.
"პირველად განიხილებოდა ვიზა ჯგუფის, სამუშაო ჯგუფის ფორმატში, იქ რამოდენიმე განხილვა შედგა. გუშინ ჩვენ რაც ვიხილეთ, ეს იყო, რომ კონკრეტულად საქართველოზე იყო მსჯელობა და არა სხვა ქვეყნებზე მუდმივი წარმომადგენლობის დონეზე. მუდმივი წარმომადგენლობა ამ განხილვების ფარგლებში ამზადებს გადაწყვეტილებას საბჭოსთვის, რომელიც არის იუსტიციის და შინაგან საქმეთა მინისტრებისგან შემდგარი საბჭო, რომელმაც უნდა მიიღოს გადაწყვეტილება," - განმარტა ჯანელიძემ.
