,,ნაციონალური მოძრაობის“ ლიდერი დავით ბაქრაძე პრემიერ-მინისტრის ინიციატივას საარჩევნო პროცესისას ძალადობის გამოვლინებაზე სასჯელის გამკაცრების თაობაზე ეხმაურება და აცხადებს, რომ ეს არაადეკვატურია. მისი თქმით, სასჯელის გამკაცრებაზე საუბარი არის თავის მართლების მცდელობა
”კორცხელის ინციდენტის შემდეგ სამი დღე გავიდა და არც ერთი ის ადამიანი, ვინც იდენტიფიცირებულია, ვისი სახელიც გვარიც ყველამ იცის და ვინც ყველამ დაინახა, არ არის დაკავებული და დაკითხვაზე დაბარებულიც კი. ასეთ პირობებში საუბარი იმაზე, რომ თურმე პარლამენტმა კანონი უნდა შეცვალოს და სასჯელი გამკაცრდეს, სრულიად არაადეკვატურია. კი ბატონო, სასჯელი უნდა გამკაცრდეს, მაგრამ დღევნდელი სანქციით უნდა დაისაჯნონ ის ადამიანები, ვინც სისასტიკე ჩაიდინა. იმ პირობებში, როდესაც ეს არ ხდება და როდესაც არც ერთი მათგანი არ არის დაკავებული, სასჯელის გამკაცრებაზე საუბარი არის საკითხის გვერდზე გადატანა და თავის მართლების მცდელობა”, - განაცხადა ბაქრაძემ.
სისხლის სამართლის კოდექსს ახალი მუხლი დაემატება, რომელიც პოლიტიკურ და საარჩევნო პროცესებში ძალადობასთან დაკავშირებით სანქციების გამკაცრებას ითვალისწინებს. როგორც იუსტიციის მინისტრმა თეა წულუკიანმა განაცხადა, კანონპროექტი 27 მაისის მთავრობის სხდომაზე მინისტრთა კაბინეტის შემადგენლობას წარედგინება.
პოლიტიკურ და საარჩევნო პროცესებში ძალადობასთან დაკავშირებით სანქციების გამკაცრების შესახებ, იუსტიციის სამინისტროს საქართველოს პრემიერ-მინისტრმა გიორგი კვირიკაშვილმა მიმართა.
