“ნორმანდიული ოთხეულის” - რუსეთის, უკრაინის, გერმანიისა და საფრანგეთის ლიდერებმა სატელეფონო საუბრისას მხარი დაუჭირეს დონბასში ეუთო-ს საპოლიციო მისიის განთავსებას და აღნიშნულ საკითხზე მოლაპარაკებების დაწყებას. ამის შესახებ ნათქვამია უკრაინის პრეზიდენტის პრესსამსახურის განცხადებაში.
პეტრო პოროშენკო, ვლადიმერ პუტინი, ანგელა მერკელი და ფრანსუა ოლანდი შეთანხმდნენ, რომ პოლიტიკური დიალოგის გასაგრძელებლად აუცილებელია ცეცხლის სრულად შეწყვეტა და მინსკის შეთანხმებების შესრულება. პოროშენკომ კიდევ ერთხელ განაცხადა, რომ რუსეთმა უკრაინის ოკუპირებული ტერიტორიებიდან ჯარი უნდა გაიყვანოს და სეპარატისტების შეიარაღება შეწყვიტოს. უკრაინის პრეზიდნეტმა ასევე უკრაინა-რუსეთის საზღვარზე კონტროლის აღდგენის აუცილებლობაზე გაამახვილა ყურადღება.
სატელეფონო საუბრისას პეტრო პოროშენკომ რუსეთს უკრაინის მოქალაქეების, მათ შორის ნადეჟდა სავჩენკოს, გათავისუფლებისკენ მოუწოდა. მან ასევე მიუღებელი უწოდა ყირიმში ყირიმელი თათრების უფლებების დარღვევა.
თავის მხრივ, კრემლის პრესსამსახური აცხადებს, რომ ვლადიმერ პუტინმა კიევს უკრაინელი სამხედროების მიერ დონბასის დასახლებული პუნქტების მისამართით ცეცხლის შეწყვეტისკენ მოუწოდა. რუსეთის პრეზიდენტი უკრაინის კონფლიქტის დარეგულირების მთავარ ელემენტად დონეცკსა და ლუგანსკის კიევთან პირდაპირ მოლაპარაკებებს ასახელებს.
