სახელმწიფო მინისტრ დავით ბაქრაძის განცხადებით, საქართველო ემზადება, რომ წევრობის გზაზე მიღწეული პროგრესი, როგორც პოლიტიკური, ისე პრაქტიკული კუთხით იყოს აღიარებული ვარშავის სამიტზე.
სამხრეთ კავკასიაში ნატო-ს სპეციალურ წარმომადგენელთან, ჯეიმს აპატურაისტან შეხვედრის შემდეგ, მინისტრმა ასევე განაცხადა, რომ საქართველოს აქვს ყველა პრაქტიკული ინსტრუმენტი, რომ მოვემზადოთ ნატო-ს წევრობისთვის.
,,ეს არის მნიშვნელოვანი პოლიტიკური გზავნილი. სწორედ ეს პრაქტიკული ინსტრუმენტები უნდა გავაძლიეროთ ვარშავის სამიტზე, იმისთვის, რომ საქართველოს თავდაცვისუნარიანობა გამკაცრდეს და თავსებადობა ნატოს ძალებთან უფრო მაღალ ხარისხში ავიდეს”, - განაცხადა დავით ბაქრაძემ.
შეხვედრას, რომელიც საქართველოს მთავრობის ადმინისტრაციაში გაიმართა საქართველოში ნატო-ს სამეკავშირეო ოფისის ხელმძღვანელი უილიამ ლაჰიუც დაესწრო.
ნატო-ს სამიტი ვარშავაში, 2016 წლის 8-9 ივლისს ჩატარდება.
