,,ნაციონალური მოძრაობის“ წევრის გოკა გაბაშვილის შეფასებით, ცენტრალური საარჩევნო კომისიის თავმჯდომარის განცხადება, კორცხელში მომხდარ დაპირისპირებასთან დაკავშირებით, სამარცხვინოა. მისი თქმით, ცესკომ არასათანადოდ შეასრულა საკუთარი ვალდებულებები და არ განმუხტა ადგილზე არსებული დაძაბული ვითარება.
"სამარცხვინოა ცენტრალური საარჩევნო კომისიის თავმჯდომარის განცხადება, რომელმაც ორივე მხარეს მოუწოდა სიმშვიდისკენ, ერთის მხრივ იქ იყვნენ ჩასული პოლიტიკოსები, მეორეს მხრივ იქ იყვნენ ჩასული ჩვეულებრივი სადამსჯელო ზონდერ ბრიგადა, რომელიც თავს დაესხა ხალხს. ორივე მხარეს კი არ უნდა მოვუწოდოთ სიმშვიდისკენ, არამედ პირდაპირი მოვალეობა უნდა შეასრულოს ცესკოს თავმჯდომარემ დაუკავშირდეს პოლიციას და განმუხტოს უბნის გარეთ სიტუაცია. ეს ეხლაც არ არის გაკეთებული ადგილობრივიხელისუფლება სინქრონში მოქმედებს ზონდერბრიგადებთან,"-აცხადებს გოკა გაბაშვილი.
ცენტრალური საარჩევნო კომისიის თავმჯდომარე თამარ ჟვანია ზუგდიდში, კორცხელის თემში მომხდარ დაპირისპირებას ეხმაურება და აცხადებს, რომ არჩევნები არის სამოქალაქო პროცესი და არა გარჩევების დღე.
ჟვანია საარჩევნო პროცესში ჩართულ პოლიტიკურ სუბიექტებსა და მათ მხარდამჭერებს მიმართავს, უზრუნველყონ სიმშვიდე და მოქალაქეებს მისცენ საშუალება, თავისუფლად გამოხატონ ნება არჩევნებზე.
”ეს არის მიუღებელი. ასეთი დაპირისპირება საარჩევნო გარემოზე დადებითად არ მოქმედებს და ზოგადად, პროცესს აზიანებს. იმის მიუხედავად, რომ საარჩევნო უბნების შიგნით პროცესი მშვიდად, წესისამებრ მიმდინარეობს, მინდა მივმართო ყველა პოლიტიკურ მხარეს, მათ მხარდამჭერებს, ნებისმიერ დაინტერესებულ პირს და მოქალაქეს, რომ არჩევნები გახლავთ სამოქალაქო პროცესი და ეს გარჩევების დღე არ არის. შესაბამისად, მინდა მივმართო მათ, უზრუნველყონ მაქსიმალური სიმშვიდე, თავი აარიდინ ყოველგვარ დაპირისპირებას და საშუალება მისცენ ხალხს, მოქალაქეებს, თავისუფლად გამოხატონ ნება არჩევნებზე”, - განაცხადა თამარ ჟვანიამ.
