,,სანამ მკვლელი არ დაისჯება, ჩვენ არ გავჩერდებით”, - ამის შესახებ შს მინისტრის მოადგილემ არჩილ თალაკვაძემ ხურჩაში მომხდარ მკვლელობასთან დაკავშირებით, „იმედის“ ეთერში განაცხადა. მისი თქმით, გამოყენებული იქნება ყველა საერთაშორისო ინსტრუმენტი. თალაკვაძის ინფორმაციით, პროკურატურა სასამართლოს მალე მიმართავს მომხდარში დამნაშავეზე საერთაშორისო ძებნის გამოცხადების თაობაზე და რაშიდ კანჯიოღლის ძებნა საერთაშორისო მასშტაბითაც დაიწყება.
„მინდა, სამძიმარი ვუთხრა გიგა ოთხოზორიას ოჯახს, ეს არის ნამდვილად ტრაგიკული შემთხვევა. კიდევ ერთი უდანაშაულო მსხვერპლი იმ უსამართლობის, რაც ხდება ოკუპირებულ ტერიტორიებზე. სანამ მკვლელი არ დაისჯება, ჩვენ არ გავჩერდებით, გამოვიყენებთ ყველა საერთაშორისო თუ ადგილობრივ მექანიზმს, რომ ეს ფაქტი არ დარჩეს დაუსჯელი. იცით, რომ შსს-მ დაიწყო გამოძიება დაუყოვნებლივ და სუს-ის კონტრდაზვერვის დეპარტამენტის დახმარებით უმოკლეს დროში დაადგინდა სავარაუდო მკვლელი. რაშიდ კანჯიოღლი პასუხისგებაში მისცა პროკურატურამ 108-ე და 236-ე მუხლებით, ასევე, დამატებით უნდა გითხრათ, რომ სულ მალე პროკურატურა მიმართავს სასამართლოს ძებნის თაობაზე და საერთაშორისო მასშტაბითაც დაიწყება ამ ადამიანის ძებნა. ეს ადამიანი უკვე მიეცა პასუხისგებაში. მას ბრალი დაუსწრებლად წარედგინა და დარწმუნებული ვარ, მასთან მიმართებაში მართლმსაჯულება აუცილებლად აღსრულდება. ჩვენ ვთანამშრომლობთ საერთაშორისო თანამეგრობასთან, ასევე, ვთანამშრომლობთ ევროკავშირის მონიტორინგის მისიასთან და გვაქვს შიდა ეროვნული მექანიზმები, რომელიც ჩვენს ტერიტორიაზე მომხდარი დანაშაულის აღკვეთას და მის დასჯას ითვალისწინებს“, - განაცხადა არჩილ თალაკვაძემ.
მისივე თქმით, მსგავსი შემთხვევები წარსულშიც ხდებოდა. არჩილ თალაკვაძემ 2007-2012 წლებში მომხდარი კონკრეტული მაგალითებიც მოიყვანა. აქვე შს მინისტრის მოადგილემ აღნიშნა, რომ შს სამინისტროს დანაყოფების მიერ პატრულირება შესუსტებული არ არის.
მინისტრის მოადგილე არ გამორიცხავს, რომ საგუშაგოების დამატება გახდება საჭირო და
ასეთ შემთხვევაში, ძალოვანი უწყება მზად არის, წარმომადგენლობა კიდევ უფრო გაზარდოს. თალაკვაძის ინფორმაციით, სუს-ის ძალისხმევით, აფხაზეთის მიმართულებით ინციდენტების პრევენციისა და მათზე რეაგირების მექანიზმების პირველი შეხვედრა უახლოეს მომავალში გაიმართება.
