,,ნაციონალური მოძრაობის“ საარჩევნო სიის წევრი სერგი კაპანაძე აცხადებს რომ ენმ-ის ხელისუფლებაში დაბრუნება ომის გარდაუვალობას არ ნიშნავს. მისი თქმით, ასეთი მოსაზრება ერთი-ორი ადამიანისგან მოისმინა.
,, ერთი-ორი ადამიანისგან (საბედნიეროდ, ძალიან ცოტა ფიქრობს ასე) მოვისმინე აბსურდული აზრი, რომ თუ ნაციონალური მოძრაობა ხელისუფლებაში დაბრუნდება, ომი გარდაუვალია, რადგან უფრო აგრესიულები იქნებიან რუსეთთან მიმართებაში. ეს სრული სისულელეა და აგიხსნით რატომაც:
1. რუსეთმა ომი 2008 წელს დაიწყო არა იმიტომ, რომ ვინმემ გააღიზიანა (ეს არის უკიდურესად მცდარი მოსაზრება), არამედ იმიტომ, რომ თავის მიზნებს სხვაგვარად ვერ მიაღწია. მთელი სირთულე იმაშია, რომ საქართველომ თავის მიზნებსაც მიაღწიოს და ომიც არ მოხდეს. ამის ძალიან კარგი მაგალითია 2009-2012 წლები, როდესაც რუსეთის მიერ გაჩაღებული ტერორისტული კამპანიის, ოკუპირებული ტერიტორიების დესტაბილიზაციის და აღიარების მსოფლიო კამპანიის საპასუხოდ ჩვენგან იღებდა ძალიან მშვიდ პასუხს. შესაბამისად, ყველგან, სადაც სცადა, დამარცხდა.
2. მავთულხლართების გადმოწევას ოკუპანტები მანამდეც ცდილობდნენ, მაგრამ ადგილზე, ზედმეტი ყვირილის, აგრესიულობის და პროვოკაციის გარეშე, ჩვენი შესაბამისი სპეც. სამსახურები ხელს უშლიდნენ. ეს არავის გაგიგიათ, და არც არავინ შეწუხებულხართ ამის გამო, შესაბამისად, არავითარი გართულება და დაპირისპირება არ მომხდარა. იმიტომ, რომ ასეთია ფარული თამაშის წესები. მათ იციან, რომ მავთულხლართები უკანონოა. თუ ღამე აუჭრი, ან ბოძს მოტეხავ, იციან, რომ ამის გამო ვერაფერს იზამენ. ამის გამო, არც ომს დაიწყებენ და არც აგრესია მოხდება. თან, თუ ევროკავშირის სადამკვირვებლო მისიას და საერთაშორისო ძალებს დროულად ჩართავ.
3. როცა მავთულხლართებზე და შენი მოქალაქეების სიკვდილზე არ პასუხობ მშვიდად, ყოველგვარი აგრესიის გარეშე, მაგრამ პრინციპულად, მათ უჩნდებათ განცდა, რომ "გაუდით". ამიტომ, მეტ ადამიანს იპარავენ, მეტ ადამიანს კლავენ, მეტი ტყვე აჰყავთ. თუ იციან, რომ აქეთა მხარეს შსს და სპეც. სამსახურები მოწოდების სიმაღლეზე არიან, ასეთ ნაბიჯებზე არ წავლენ. იმიტომ, რომ ზედმეტი და გაუმართლებელი რისკია. ამიტომ იყო, რომ როცა ტერორს მიმართავდნენ ოკუპირებული ტერიტორიებიდან, პასუხად იღებდნენ მკაცრ ზომებს. ამას არც ომი მოჰყოლია და არც დაპირისპირება. და იპრმ-იც მშვენივრად მოქმედებდა იმ პირობებში და დიალოგიც იყო.
4. თუ ხედავენ, რომ ტერორისტებს, ჯაშუშებს და დივერსანტებს მაინც ვუშვებთ, მაშინ რა სტიმული აქვთ, რომ მეტი ტერორისტული აქტი და პროვოკაცია არ ჩაიდინონ?
ამიტომ, სანამ ეს ხელისუფლება ასე უსუსურად რეაგირებს, მანამდე ისევ მოსალოდნელია მსგავსი სამწუხარო ინციდენტები.
და ბოლოს: ერთადერთი ძალა, რომელსაც ძალა შესწევს, რომ ქვეყნის უსაფრთხოება დაიცვას, ადგილობრივი მოსახლეობის უსაფრთხოება დაიცვას და თან ქვეყნის ინტერესები დაიცვას ისე, რომ არც ომი მოხდეს და არც მავთულხლართები გამოდგვიწიონ აქეთ, სწორედ განახლებული ნაციონალური მოძრაობაა. ის განახლებული ნაციონალური მოძრაობას, რომელშიც მე გავწევრიანდი, რადგან დავინახე, რომ არის შანსი, რომ ჩვენ ვიყოთ მშვიდობიანად რუსეთთან, და ამასთან თავმოყვარეობა და ღირსება შევინარჩუნოთ და ჩვენი მოქალაქის სიკვდილს არ ვუწოდოთ "ერთჯერადი აქტი", - აცხადებს სერგი კაპანაძე.
