საარჩევნო ცვლელებისა და 2016 წლის არჩევნების გერმენული მოდელით ჩატარების ინიციატივის ერთ-ერთი ავტორი, ახალი მემარჯვენეების ლიდერი მამუკა კაციტაძე ”ქართული ოცნების” აღმასრულებელ მდივანს პასუხობს და მას არაკვალიფიციურობაში დებს ბრალს.
”ნამდვილად ვეთანხმები ირაკლი კობახიძეს იმაში, რომ ქართულ პოლიტიკურ ელიტაში იურიდიული კვალიფიკაციის დონე ძალიან დაბალია და ამის ნათელი მაგალითია თავად ბატონი კობახიძე”, - განუცხადა ”ჯი-ეიჩ-ენს” მამუკა კაციტაძემ
მისი თქმით, ხელისუფლებას არ სურს საარჩევნო ცვლილებების განხორციელება და გამოსავალს ეძებს.
”კობახიძე ითხოვს იმის დამტკიცებას, როგორ უდრის 150 77-ს. იქნებ გადაშალოს მან საქართველოს კონსტიტუცია და წაიკითხოს 49-ე მუხლი, სადაც წერია, რომ 150 დეპუტატიდან 77 აირჩევა პროპორციული წესით, ხოლო 73 მაჟორიტარულით”, - განაცხადა კაციტაძემ და დასძინა, რომ ანალოგიური დათქმები არის იმ ქვეყნების კანონმდებლობაში სადაც მოქმედებს გერმანული მოდელლი.
კაციტაძემ ასევე აღნიშნა, რომ წარმოდგენილი საკანონმდებლო ცვლილებებით მაჟორიტარული ერთმანდატიანი ოლქები არ უქმდება, საკონსტიტუციო ცვლილება საჭირო არ არის და მანდატები ნაწილდება მიღებული ხმების პროპორციულად 150 დეპუტატიდან. არანაირი ახალი ადამიანისტრაცია, ან საქმიანობის სხვაგვარი გაწევა, ან ამომრჩევლის განსაკუთრებული მომზადება, ან საარჩევნო სუბიექტებს რაიმე სიახლეები გათვალისწინებული არ არის და მხოლოდ ხმების დათვლა ხდება სხვაგვარად - ჩატარებული არჩევნების შემდეგ.
შეგახსენებთ, რომ ირაკლი კობახიძის განცხადებით, გერმანული მოდელის შემოღებას უპირობოდ ესაჭიროება საკონსტიტუციო ცვლილებები. შემაშფოთებელია ის ფაქტი, რომ ასეთი საკითხები კითხვის ნიშნის ქვეშ დგება. ეს ყველაფერი იმაზე მეტყველებს, რომ პოლიტიკურ ელიტაში იურიდიული კვალიფიკაციის დონე ძალიან დაბალია.
“გერმანულ მოდელსა და საქართველოს კონსტიტუციის მოქმედ ჩანაწერს შორის პირდაპირი წინააღმდეგობა არსებობს. ბატონი ვახტანგ ხმალაძე ამტკიცებს, რომ 150 უდრის 77-ს და თუ ის ამას დამიმტკიცებს, შეიძლება, ხელები ავწიო. მოდელის მიზანშეწონილობაზე შეიძლება ვიმსჯელოთ, მაგრამ მიზანშეწონილობა ერთი საკითხია და კონსტიტუციურობა - მეორე. საქართველოს პარლამენტში არ არსებობს იმის პრაქტიკული შანსი, რომ ეს ცვლილებები გავიდეს”, - განაცხადა „ქართული ოცნების“ აღმასრულებელმა მდივანმა.
