დეპუტატი თამაზ მეჭიაური განმარტავს, რომ მის მიერ უმრავლესობის დატოვება არ ნიშნავს, არჩევნებამდე მმართველ გუნდთან დაპირისპირებას.
თამაზ მეჭიაურის დღეს გამართულ პრესკონფერენციაზე განაცხადა, რომ მისი გადაწყვეტილება დააჩქარა პრემიერ-მინისტრის განცხადებამ, რომელმაც ,,თინა ხიდაშელის მხარე დაიჭირა“.
დეპუტატმა ასევე განაცხადა, რომ არ გამორიცხავს სხვადასხვა პოლიტიკურ პარტიებთან თანამშრომლობას.
„პატივს ვცემ ჩემს თანამოაზრეებს, ჯერ მათთან უნდა გავიარო კონსულტაციები და ამის შემდეგ მივიღებ გადაწყვეტილებას, ვისთან ვითანამშრომლებ. მე ძალიან დიდი პატივს ვცემ „პატრიოტთა ალიანსს“. რაც შეეხება „მრეწველებს“ მათაც დიდ პატივს ვცემ, ბევრ საკითხში ჩვენი ხედვები ემთხვევა ერთმანეთს“, - განაცხადა თამაზ მეჭიაურმა.
მეჭიაურის თქმით, უნდა დაჯგუფდნენ პოლიტიკური ძალები და გადაწყვიტონ, ვის უნდა ნატო და ვის რუსეთი.
„დაჯგუფდნენ ერთად ვისაც უყვარს ნატო, ვისთვისაც რუსეთია მხსნელი, ისინიც ერთად დაჯგუფდნენ, ვისთვისაც ეროვნული ინტერესებია ისინიც დაჯგუფდნენ და ხალხმა თვითონ გადაწყვიტოს, ვის უჭერს მხარს. მე უფრო შუა, ეროვნულ ჯგუფში ვიქნები, რომელიც საკვანძო საკითხებზე, როგორიცაა მაგალითად საგარეო ვექტორი, შევეკითხები ხალხს. პლებისციტი - ნატოში შესვლა რომ ქართველი ხალხის არჩევანია, რასაც მოქმედი ხელისუფლებაც იზიარებს, ეჭვქვეშ დასაყენებელია”,- განაცხადა თამაზ მეჭიაურმა.
