განსხვავებული სქესობრივი ორიენტაციის ხალხი ყოველთვის არსებობდა და ყოველთვის იარსებებს - ეს მოცემულობაა, - ამბობს საზოგადოება „ივერიის“ დამფუძნებელმა ნიკა რურუა და აღნიშნავს, რომ 17 მაისზე თუნდაც იმიტომ უნდა ითქვას ორიოდ სიტყვა, რომ არნახული მობილიზაციაა გამოცხადებული განსხვავებული ხალხის, აზრის, და საერთოდ განსხვავებულობის კატეგორიული მოწინააღმდეგეების მხრიდან.
„რა თქმა უნდა, გაჩუმება, და ხმის არამოღება ბევრად უსაფრთხო, თუმცა ნაკლებ ღირსეული ქცევა მგონია.
საკუთარი სიკარგის მტკიცება სხვისი დემონიზაციის, დაგმობის ხარჯზე მდაბიური რამეა. ჩვენ, როგორც ადამიანები და პიროვნებები, ვინ ვართ, ეს საბოლოოდ მაინც საკუთარ სისუსტეებთან ჭიდილით ირკვევა, და არა სხვებთან შედარებით.
განსხვავებული სქესობრივი ორიენტაციის ხალხი ყოველთვის არსებობდა და ყოველთვის იარსებებს - ეს მოცემულობაა. სულაც არაა აუცილებელი, რომ ჩვენ მოგვწონდეს ან გვიყვარდეს სხვების ამგვარი ვინაობა ან ცხოვრების სტილი, მაგრამ, ადამიანების დამცირება, დაკნინება, დაშინება, რასაც სხვაგვარად დისკრიმინაციასაც უწოდებენ, არაა არც ღირსეული, არც სამართლიანი და არც კანონიერი საქციელი.
საზოგადოებრივი მორალის სახელით საკუთარი ირაციონალური შიშების შენიღბვა კი არაა არც მართებული და არც კეთილგონიერი ქმედება.
როგორც მინიმუმ, ტოლერანტობა, ის ცივილიზებული პოზიციაა, რომელიც ნებისმიერმა რაციონალურმა ადამიანმა უნდა არჩიოს სიძულვილსა და ზიზღს რაღაცის მიმართ, რაც ვიღაცისთვის - სხვა ადამიანისთვის - მისი არსების ნაწილია. ადამიანებს აქვთ სურვილი იყვნენ ისეთი, როგორც მათ სურთ და როგორადაც თავი მიაჩნიათ.
თავისუფალი ქვეყანა ნიშნავს იმას, სადაც ყველა მოქალაქის უფლება, უმცირესობისა თუ უმრავლესობის - ნებისმიერ საკითხში - დაცული და გარანტირებული უნდა იყოს.
სხვაგვარად ქცევა, ჩემი აზრით, არც გვეკადრება, როგორც თავისუფალ ადამიანებს, ვინც სხვის თავისუფლებასაც ისევე სცემს პატივს, როგორც საკუთარს“, - ამბობს რურუა.
