,,რესპუბლიკელები“ პირველივე დღიდან ეწინააღმდეგებოდნენ საქართველოს პრეზიდენტის ინსტიტუტს- ამის შესახებს პრეზიდენტის ადმინისტრაციის უფროსმა განაცხადა. გიორგი აბაშიშვილის თქმით, ,,რესპუბლიკელები“ ყოველთვის დიდი მონდომებით მონაწილეობდნენ პრეზიდენტის მიერ ვეტოდადებულ არაკონსტიტუციურ კანონებზე ვეტოს დაძლევაში.
”ბერძენიშვილის კომენტარი, სიტყვათა წყობა, აზრთა წყობა ძალიან გავდა ”ქართული ოცნების“ წევრების, მათ შორის ბატონი მეჭიაურის განცხადებებს. ამავდროულად, თავდაპირველად ”რესპუბლიკურ პარტიაში“ საუბრობდნენ, რომ ისინი მხარს უჭერდნენ პრეზიდენტს, გუშინ ბერძენიშვილის განცხადებამ დაადასტურა, რომ ისინი პირველივე დღიდან ეწინააღმდეგებოდნენ პრეზიდენტს. ”რესპუბლიკური პარტია“ ყოველთვის დიდი მონდომებით მონაწილეობდა პრეზიდენტის მიერ ვეტოდადებულ არაკონსტიტუციურ კანონებზე ვეტოს დაძლევაში. უფრო მეტიც, ”რესპუბლიკური პარტიის” წევრი ნოდარ ებანოიძე თამაზ მეჭიაურთან ერთად იყო ავტორი საბანკო ზედამხედველობის კანონის, რომელიც ითვალისწინებდა ეროვნული ბანკის დანაწევრებას. ეს კანონი შეჩერებული იქნა”, - განაცხადა გიორგი აბაშიშვილმა.
