ბესელია-ფოფხაძე-სესიაშვილის ავტორობით მიღებულმა ცვლილებებმა არ გაამართლა და ამის დადასტურება ფარულ მიყურადებასთან დაკავშირებით ბოლო პერიოდში განვითარებული მოვლენებია, ამის შესახებ ”რესპუბლიკელების” ლიდერმა დავით ბერძენიშვილმა რესპუბლიკელების ფრაქციასთან მოძრაობა ”ეს შენ გეხებას” წევრების შეხვედრისას განაცხადა.
შეხვედრაზე საუბარი ”ეს შენ გეხებას” მიერ მომზადებულ საკანონმდებლო ინიციატივას შეეხო.
„2014 წლის ბოლოს ვახტანგ ხმალაძის ინიციატივით რესპუბლიკელებმა ალტერნატიული კანონპროექტი შევიტანეთ, მაშინ ბევრს ახსოვს, რომ სწორედ მაღალი ნდობის მქონე სახელმწიფო ინსტიტუტში უნდა ყოფილიყო გასაღები. ”ეს შენ გეხებას” შემოთავაზებაში სწორედ მაღალი ნდობის სახელმწიფო ინსტიტუტში სპეციალურად შექმნილ სააგენტოში უნდა იყოს გასაღები, ჩვენ ამას ვეთანხმებით ,“- განაცხადა შეხვედრაზე დავით ბერძენიშვილმა.
საიას იურისტის გიორგი გოცირიძის განცხადებით, რესპუბლიკურ პარტიასთან შედგა შეთანხმება ისეთ პრინციპულ საკითხზე, როგორიცაა სააგენტოს შექმნა.
„პრინციპულ საკითხებზე რაც ეხება სააგენტოს შექმნას და რომ იქნება ერთი გასაღები, ამ საკითხზე მოხდა პოზიციების თანხვედრა. ჩვენ ვაპირებთ სხვა საპარლამენტო პარტიებთან შეხვედრასაც და იმედი გვაქვს, რომ მივაღწევთ შეთანხმებას,“-განაცხადა გიორგი გოცირიძე.
