საქართველოს მთავარი პროკურორის განცხადებით, გია გვიჩიანის საქმესთან დაკავშირებით, მიმდინარეობს ფაქტების გადამოწმება, თუ რამდენად კანონიერად იყო მოპოვებული მტკიცებულებები, რომელიც დაეფუძნა სასამართლოს განაჩენი. ირაკლი შოთაძემ ნიკა ლომინაძის მკვლელობის საქმეზე დაკავებულების, გია გვიჩიანისა და ნიკა ჩემიას საკითხზე კომენტარი დღეს გააკეთა.
„არსებობდა პრეტენზიები, რომ არასწორად ჩატარდა თავის დროზე გამოძიება, არ იყო თავმოყრილი ყველა მტკიცებულება ამ მკვლელობის ფაქტზე. სწორედ ამ მიმართულებით ვმუშაობთ ახლა, თუმცა დეტალებზე ვერ ვისაუბრებ. უახლოეს მომავალში შესაბამისი დონეზე მივა გამოძიება და სამართლებრივი შეფასებას მივცემთ ფაქტებს. შესაბამისად მოგაწვდით ინფორმაციასაც. ერთი შემიძლია, გითხრათ, კანონიერი სასამართლო გადაწვეტილების გადახედვა შეუძლია მხოლოდ სასამართლოს“,- აღნიშნა ირაკლი შოთაძემ.
შეგახსენებთ, თელასის მენეჯერი ნიკა ლომინაძე 2002 წლის 13 აგვისტოს, ბახტრიონზე მდებარე საკუთარ საცხოვრებელ სახლში მოკლეს. მისი მკვლელობის შემკვეთად თელასის ექსპერტი გია გვიჩიანი ცნეს და 2006 წელს დააკავეს. უვადო პატიმრობამისჯილი გვიჩიანი თავს უდანაშაულოდ ცნობდა და თავის დაკავებას სანდრო გირგვლიანის მკვლელობის გადაფარვის მიზანს უკავშირებდა. დანაშაული არ აღიარა მკვლელობის შემსრულებლის ბრალით გასამართლებულმა ნიკა ჩემიამაც და გიორგი გვიჩიანის მსგავსად მას უვადო თავისუფლების აღკვეთა მიესაჯა.
საქმეზე ასევე დააკავეს ნოდარ გვიჩიანი, როგორც შუამავალი შემკვეთს და მკვლელობის შემსრულებლებს შორის. სწორედ მისი აღიარებითი ჩვენება გახდა ერთადერთი პირდაპირი მტკიცებულება გიორგი გვიჩიანის და ნიკას ჩემიას დაპატიმრების და შემდგომ მისი გასამართლების. მამხილებელი ჩვენების სანაცვლოდ, ნოდარ გვიჩიანს, რომელსაც ჩადენილი ჰქონდა განსაკუთრებით მძიმე სხვა დანაშაულები, გაუფორმდა საპროცესო შეთანხმება და სრულიად გათავისუფლდა სასჯელისაგან.
2014 წლის ივლისში, თბილისის სააპელაციო სასამართლომ თელასის მენეჯერის ნიკა ლომინაძის მკვლელობაში ბრალდებულებს, უვადო პატიმრობაში მყოფ გია გვიჩიანსა და ნიკა ჩემიას 15-15 წლით თავისუფლების აღკვეთა მიუსაჯა. სასჯელის ათვლა 2006 წლის 7 მარტიდან დაიწყო.
