,,ნაციონალური მოძრაობის“ წევრებმა „ევროპის სახალხო პარტიის“ ინიციატივას - საქართველოს ვიზალიბერალიზაციის საკითხის არჩევნების შემდეგ განხილვის შესახებ, მხარი არ დაუჭირეს. ამის შესახებ ბრიუსელში მყოფმა, ენმ-ის წევრმა ტარიელ ლონდარიძემ ქართველ ჟურნალისტებს განუცხადა.
მისი თქმით, ქართველი მოსახლეობა ვიზალიბერალიზაციას იმსახურებს.
„განცხადებას, რომელიც „ევროპის სახალხაო პარტიამ“ გააკეთა ვიზალიბერალიზაციის საკითხზე, „ნაციონალურმა მოძრაობამ“ და ასოცირების კომიტეტის წარმომადგენელთა უმრავლესობამ მხარი არ დაუჭირეს, იქიდან გამომდინარე, რომ ვიზალიბერალიზაციას ქართული მოსახლეობა ნამდვილად იმსახურებს. ზოგადად რაც შეეხება რეზოლუციის, ჩვენ არ ვართ კმაყოფილი იმ ნაწილით, რომელიც ეხება მედიის თავისუფლებას, კერძოდ „რუსთავი 2“-თან დაკავშირებულ პრობლემებს, რომელიც არ იქნა გაზიარებული. ვფქრობ, რომ ეს აუცილებლად უნდა ყოფილიყო რეზოლუციაში, რადგან წინასაარჩევნოდ მედიის თავისუფლება არის უმთავრესი გარანტი წარმატებული და დემოკრატიული არჩევნების ჩატარების“, - განაცხადა ლონდარიძემ.
მისი თქმით, „ნაციონალურმა მოძრაობამ“ მხარი არ დაუჭირა რეზოლუციის იმ ნაწილს, რომელიც სასამართლოს ეხებოდა.
„არ დავუჭირეთ მხარი, რომ ამოღებული ყოფილიყო ის ნაწილი, რომელიც ეხებოდა საკონსტიტუციო სასამართლოს მოსამართლეების დაცვის საკითხს და ხელისუფლებისკენ მოწოდებას, რომ მათ უზრუნველყონ სასამართლო ხელისუფლების დაცვა. აქედან გამომდინარე ჩვენ საერთოდ რეზოლუციის მიღებას, ამ საკითხებიდან გამომდინარე მხარი არ დავუჭირეთ“, - განაცხადა ლონდარიძემ.
