საპარლამენტო უმრავლესობის ლიდერის ზვიად კვაჭანტირძის განცხადებით, იაცეკ სარიუშ-ვოლსკი და ,,მისნაირად ანგაჟირებულები თავიანთ საწადელს ვერ მიაღწევენ“. "ევროპის სახალხო პარტიის" წევრის მიერ გაკეთებული განცხადების შეფასებისას, რომლის თანახმადაც საქართველოსთვის ვიზალიბერალიზაცია არჩევნებამდე არ უნდა განხორციელდეს, კვაჭანტირაძემ ასევე განაცხადა, რომ „სახალხო პარტიის“ წარმომადგენლების შენიშვნებიდან უმეტესობა გაზიარებულია.
„ქართველი ხალხის, ჩვენი ქვეყნის ბედი არ იქნება დამოკიდებული მერაბიშვილსა და უგულავაზე, ამას ვამბობ სრული პასუხსიმგებლობით. ბატონმა ვოლსკიმ და მისმა კოლეგებმა, ერთი გამონაკლისის გარდა, გუშინ არ მიიღეს შეხვედრაში მონაწილეობა, რადგან ეს მათი ინტერესის სფეროში არ შედიოდა. ისინი დღეს დილიდანაც არ გამოჩნდნენ სხდომაზე. მოვიდნენ მხოლოდ მაშინ, როდესაც უნდა მომხდარიყო კენჭისყრა დასკვნით რეკომენდაციებზე. მიუხედავად იმისა, რომ ჩვენ პრაქტიკულად შევეცადეთ, ვყოფილიყავით მაქსიმალურად მობილიზებული, რათა ჩვენი ოპონენტების აზრი გაგვეზიარებინა, სადაც ამის შესაძლებლობა იყო. ჩვენ მართლაც გავიზიარეთ „სახალხო პარტიის“ წარმომადგენლი შენიშვნებიდან უმეტესობა, მაგრამ იმას, რასაც ვერ გავიზიარებდით, მათ ძალიან კარგად იცოდნენ“, - განაცხადა ზვიად კვაჭანტირაძემ.
მისივე თქმით, დღეს კომიტეტმა აბსოლუტური უმრავლესობით, როგორც ქართული, ასევე ევროპარლამენტის მხრიდან მიიღო დასკვნითი რეკომენდაციები, რომელსაც კარგი გავლენა ექნება პროცესების დაჩქარებაზე ვიზალიბერალიზაციასთან დაკავშირებით.
„რასაც ბატონი ვოლსკი ამბობს დღეს უკვე სატელევიზიო კომენტარებში არის აბსოლუტური სიცრუე, მისი პირადი განწყობა, პირადი პოზიცია. ეს არ არის ევროპარლამენტის და ევროსტრუქტურების პირადი პოზიცია და რაც უნდა მოინდომონ ვოლსკიმ და მისნაირად ანგაჟრებულმა ჩვენმა ოპონენტებმა, ისინი თავინათ საწადელს ვერ მიაღწევენ. ისინი არ წყვეტენ საბოლოოდ საქართველოს და მისი ხალხის ბედს“, - განაცხადა ზვიად კვაჭანტირაძემ.
