პარლამენტის ვიცე-სპიკერი მანანა კობახიძე საქართველოს ყოფილი პრეზიდენტის, მიხეილ სააკაშვილის განცხადებას ეხმაურება, რომლის თანახმადაც 2016 წლის საპარლამენტო არჩევნებში აუცილებლად „ნაციონალური მოძრაობა“ გაიმარჯვებს და ის საქართველოში დაბრუნდება.
„კარგი ის არის, რომ ეს ადამიანი დღეს არ არის საქართველოს მოქალაქე. კარგი ისაა, რომ თუკი ეს ადამიანი ოდესმე სამშობლოში ჩამოსვლის გადაწყვეტილებას მიიღებს, ის აუცილებლად წარსდგება მართლმსაჯულების წინაშე. რაც შეეხება განწყობებს, მე არა მგონია, საქართველოში ოდესმე ადამიანებმა ისურვონ დააბრუნონ ის ძალისმიერი რეჟიმი, ის სისტემა, რომელიც იდგა დანაშაულზე, ღირსების შელახვაზე, ადამიანების წამებაზე, საკუთრების უფლების ხელყოფაზე, სიცოცხლის ხელყოფაზე, ქუჩაში სისხლისღვრაზე. ასეთი რეჟიმის დაბრუნებას თუ ოდესმე საქართველო ისურვებს, მაშინ, ამ ქვეყანას უბრალოდ, შეიძლება ითქვას, საქართველო აღარ უნდა ერქვას“, - განაცხადა მანანა კობახიძემ.
ოდესის გუბერნატორი მიხეილ სააკაშვილი საქართველოში დაბრუნებას არსებული ხელისუფლების შეცვლის შემდეგ გეგმავს, თუმცა ამავე დროს არ აპირებს დატოვოს უკრაინის პოლიტიკური სივრცე. ,,რუსთავი 2“ - თან საუბარში საქართველოს ყოფილმა პრეზიდენტმა ასევე განაცხადა, რომ დარწმუნებულია ,,ნაციონალური მოძრაობის“ გამარჯვებაში.
"დარწმუნებული ვარ გამარჯვებაში, ამაში საერთოდ ეჭვიც არ მეპარება. არის ორი ძალა, ერთი უკავშირდება ბიძინა ივანიშვილს, მეორე მიკავშირდება მე. არ არსებობს ამ ეტაპზე მესამე არაფერი. ეს მე მაკისრებს განსაკუთრებულ პასუხისმგებლობას და კიდევ ერთხელ ვიმეორებ, როგორც უკრაინაში არ მივილტვი თანამდებობისკენ, მე დღეს საქართველოში არაფრისკენ არ მივილტვი. ჩემი ამოცანა არის, რომ რადგან ასე ჩამოყალიბდა ხალხის თვალში, ან ეს რუსი ოლიგარქი ან ის რასთანაც მე ვარ დაკავშირებული, მე თვითონ ვიყო ბევრად უფრო უკეთესი ვიდრე ოდესმე. როგორც იგეგმება და როგორც ყველაფერი გათვლილი გვაქვს, ეს არჩევნები ჩავამთავროთ, მოვიგოთ, მერე ჩამოვიდე, დავსხდეთ და დავეხმაროთ იმ ხალხს, იმ ჯგუფს, რომელიც გაიმარჯვებს”, - ამბობს მიხეილ სააკაშვილი.
