განმუხურში ხუთვარსკვლავიანი სასტუმროს მშენებლობა და განმუხურ-ანაკლიაში არსებული ინფრასტრუქტურის განვითარება, ზუგდიდის მუნიციპალიტეტისა და მხარის ადმინისტრაციის მნიშვნელოვან საზრუნავს წარმოადგენს. ამის შესახებ ”ჯი-ეიჩ-ენს” ზუგდიდის მუნიციპალიტეტის გამგებელმა ედიშერ თოლორაიამ განაცხადა.
გამგებელი მიესალმა კომპანია „ბლექს სი რივერას“ ინიციატივას განმუხურში ხუთვარსკვლავიანი მშენებლობის შესახებ.
”კომპანია „ბლექს სი რივერას“ სურვილი, განმუხურში ხუთვარსკვლავიანი სასტუმროს მშენებლობის შესახებ, ნამდვილად მისასალმებელია. მათი ინიციატივით იქმნება მნიშვნელოვანი იმპულსი ინვესტორებისთვის, რათა ისინიც დაინტერესდნენ აქ მშენებლობებითა და ინფრასტრუტურული პროექტების განხორციელებით”, - განაცხადა ედიშერ თოლორაიამ.
მან ასევე აღნიშნა, რომ შესაბამისი პროექტები მნიშვნელოვანია ადგილობრივი და რეგიონის მოსახლეობის დასაქმების თვალსაზრისით.
”ასეთი სახის პროექტები ხელს უწყობს ადგილობრივი კადრების დასაქმებას, მათი კვალიფიკაციის ზრდას. მათზე მიბმულია არა ერთი ეკონომიკური მმიმართულება, დაწყებული სოფლის მეურნეობიდან და მაღალი ტექნოლოგიებით დასრულებული”, - განაცხადა თოლორაიამ.
მისვე თქმით, განმუხური-ანაკლიას სანაპირო ზოლის, ზუგდიდის მუნიციპალიტეტის და მთლიანად რეგიონის განვითარება თვალშისაცემი იქნება ოკუპირებული ტერიტორიების მოსახლეობისთვის.
”ეს იქნება ერთგვარი ალტერნატივა აღმშენებლობასა და სტაგნაციას, მუდმივ ეკონომიკურ კრიზის შორის. შესაბამისად, ოკუპირებუოლ ტერიტორიებზე მცხოვრები მოსახლეობა, ჩვენი აფხაზი თანამუმამულეები თავად ნახავენ სად არის მათთვის უკეთესი. სად არის აღმშენებლობა და სად არის პერსპექტივა”, - განაცხადა ედიშერ თოლორაიამ.
შგახსენებთ, რომ კომპანია „ბლექს სი რივერას“ წარმომადგენლებმა ადგილობრივ ხელისუფლებას სასტუმროს პროექტი გააცნეს. ახალი სასტუმროს და მიმდებარე ინფრასტრუქტურის პროექტის პრეზენტაციას მშენებელი კომპანია უახლოეს მომავალში გეგმავს.
შპს „ბლექს სი რივერა“ სოფელ განმუხურში მინიმუმ 120 ნომრიან სასტუმრო კომპლექსს ააშენებს. კომპანიამ ეკონომიკისა და მდგრადი განვითარების სამინისტროს სსიპ „სახელმწიფო ქონების ეროვნული სააგენტოს“ მიერ გამოცხადებულ პირობებიან ელექტრონულ აუქციონში გაიმარჯვა. რომლის საწყისი საბაზრო ღირებულება 2 263 500 ლარად იყო განსაზღვრული. აუქციონი მიმდინარე წლის 30 მარტს ჩატარდა.
საინვესტიციო პროექტის მიხედვით ,,ბლექს სი რივერა“ სასტუმრო კომპლექსის ტერიტორიაზე ღია და დახურულ საცურაო აუზებს, სპორტულ მოედნებს და ჩოგბურთის კორტებს მოაწყობს. ახალი ხუთვარსკვლავიანი სასტუმრო ასევე უზრუნველყოფილი იქნება პარკინგით და კეთილმოწყობილი, გამწვანებული ეზოთი. პროექტის განხორციელება მაქსიმუმ 60 თვის ვადაში მოხდება. მისი საინვესტიციო ღირებულება მინიმუმ ათ მილიონ ლარს შეადგენს.
ახალ სასტუმროში ადგილობრივები დასაქმდებიან, მშენებლობის დასრულებამდე კი მათი გადამზადება მოხდება.
