მორიგი კომპრომისი ინვესტორთან. აჭარის მთავრობამ კომპანია "მაჭახელა 25"-ს ვალდებულებების შეუსრულებლობისთვის დაკისრებული ჯარიმა აპატია. ინვესტორმა აღნიშნული თხოვნით მთავრობას თავად მიმართა, რაზეც საბოლოოდ დადებითი პასუხი მიიღო.

კომპანია "მაჭახელა 25"-მა, რომელმაც  ხელვაჩაურის მუნიციპალიტეტის სოფელ ქედ-ქედში მდებარე 3676 კვ/მ  და სოფელ კირნათში მდებარე 26332 კვმ არასასოფლო-სამეურნეო დანიშნულების მიწის ნაკვეთი პირდაპირი მიყიდვის წესით, 1 ლარად მიიღო, აღნიშნულ ტერიტორიაზე რესტორანი, მინიმუმ 20 ნომერზე გათვლილი სასტუმრო, არანაკლებ 30 ადგილიანი საკონფერენციო დარბაზი და სპორტული გასართობი დარბაზი უნდა აეშენებინა. თუმცა ინვესტორმა ვალდებულებები დროულად ვერ შეასრულა და ამისათვის შესაბამისი ჯარიმაც დაეკისრა 627 881,2  ლარის ოდენობით.

"მაჭახელა 25"-ში პირობების შეუსრულებლობას რამდენიმე ფაქტორით ხსნიან, მათ შორისაა კომპანიის ფინანსური კრიზისი და ვალუტის კურსის ცვლილებება. ამასთან, კომპანია აღნიშნავს, რომ 2015 წლის 12 ნოემბერს მაჭახელას ხეობაში განვითარებული ძლიერი ქარის (ქარბორბალას) შედეგად დაიშალა სასტუმროს ტიპის ოთხივე კოტეჯი, რის გამოც ინვესტორს ახალი მშენებლობის ნებართვის მიღება დასჭირდა.

აღნიშნული გარემოებებიდან გამომდინარე, მყიდველმა აჭარის ფინანსთა და ეკონომიკის სამინისტროში წარდგენილი წერილით ითხოვა ხელშეკრულებით გათვალისწინებული ვალდებულებების დაგვიანებით შესრულებისათვის დარიცხული ჯარიმისაგან გათავისუფლება, გარდა 25 500 ლარისა, რომელიც გადახდლილი იქნება ეტაპობრივად წერილზე თანდართული გრაფიკის მიხედვით და ასევე ხელშეკრულებაში ცვლილებების შეტანა, კერძოდ: - სასტუმროს ტიპის კოტეჯების აღდგენის მიზნით დამატებითი ვადის მიცემას 2016 წლის 1 ივლისამდე.