ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის განცხადებით, ე.წ. სამხრეთ ოსეთის რუსეთთან შეერთების საკითხთან დაკავშირებით რეფერენდუმის ჩატარებას არავითარი იურიდიული ძალა არ ექნება. დავით ბაქრაძემ ჟურნალისტებთან ასევე განაცხადა, რომ ასეთ საკითხთან დაკავშირებით საერთაშირისო საზოგადოების აზრი მობილიზებული და ერთიანია.
”ეს არის ყველანაირი საერთაშორისო ნორმის და სტანდარტის დარღვევა. ეს იქნება საერთაშორისო სამართლის იგნორირებით განხორიცლებული ქმედება და ამას არავითარი იურიდიული ძალა არ ექნება”, -განაცხადა მინისტრმა.
ოკუპირებული სამხრეთ ოსეთის დეფაქტო პრეზიდენტი ლეონიდ თიბილოვი “ტასისთვის” მიცემულ ინტერვიუში აცხადებს, რომ მიმდინარე წლის აგვისტომდე, ე.წ. სამხრეთ ოსეთში, რუსეთის შეამდგენლობაში შესვლის საკითხზე რეფერენდუმის გამართვა იგეგმება. ,,რაიმე კონკრეტულ თარიღს ჯერ ვერ დავასახელებთ. თუმცა ეს ახლო მომავალში მოხდება, აგვისტომდე”, - განაცხადა თიბილოვმა.
თიბილოვის განმარტებით, რეფერენდუმზე გაიტანენ საკითხს ე.წ. სამხრეთ ოსეთის კონსტიტუციის შეცვლის შესახებ, რაც ცხინვალს საშუალებას მისცემს, რუსეთს შეერთების თხოვნით მიმართოს. ამავე დროს, ოკუპირებული რესპუბლიკის დეფაქტო პრეზიდენტი აღნიშნავს, რომ ცხინვალი არ ელის, რომ რუსული მხარე რეფერენდუმის შედეგებზე დაუყოვნებლივ რეაგირებას მოახდენს.