ფრაქცია “ქართული ოცნების” თავმჯდომარე გია ვოლსკი აცხადებს, რომ გიორგი კვირიკაშვილის პოსტიდან გადადგომის ვალდებულება არ უნდა ჰქონდეს, რადგან ეს გამოიწვევს მთავრობის გადადგომასაც წინასაარჩევნოდ. მისი თქმით, ეს პროცესები ქვეყნის სტაბილურობას შეარყევს.
“ჩვენი სურვილია, კვირიკაშვილი, როგორც ჩვენი ლიდერი, სიის პირველი ნომერი იყოს, მაგრამ არ უნდა დავუშვათ, რომ მას პოსტიდან გადადგომის ვალდებულება ჰქონდეს, რადგან ეს მთავრობის გადადგომას, მოკლე ვადაში ახალი შემადგენლობის დამტკიცებას და თვენახევრიანი მთავრობის დაკომპლექტების პროცესს მოიტანს. ამით კი, დიდი გამოწვევების წინაშე მდგარი ქვეყანა დაზარალდება. რყევებს უნდა მოვერიდოთ და სტაბილურობა შევინარჩუნოთ. შიში, რომ შესაძლოა, პრემიერმა ადმინისტრაციული რესურსი გამოიყენოს, უსაფუძვლოა”. - განაცხადა გია ვოლსკიმ.
პარლამენტმა ,,საარჩევნო კოდექსში“ ცვლილებები უნდა განიხილოს, რომლის თანახმადაც, დეპუტატობის კანდიდატ პრემიერ-მინისტრს წინასაარჩევნოდ თანამდებობიდან გადადგომის ვალდებულება არ ექნება.
