საარჩევნო კოდექსში შესტან ცვლილებებს, რომლის თანახმადაც პარლამენტის წევრობის კანდიდატობის შემთხვევაში, პრემიერ-მინისტრს წინასაარჩევნოდ თანამდებობიდან გადადგომის ვალდებულება არ ექნება, ,,თავისუფალი დემოკრატების“ ლიდერი ეხმაურება. ირაკლი ალასანია მიიჩნევს, რომ ,,ეს ძალიან გავს სააკაშვილის დროინდელ ბოლო პერიოდს, როდესაც კანონმდებლობის, კონსტიტუციის და ყველაფრის მორგება მიდიოდა ერთი პიროვნების ირგვლივ”.
მისივე თქმით, აქამდე ეს საკითხი არავის გახსენებია.
,,აქამდე არ გახსენებიათ და უფრო მნიშვნელოვანი საკონსტიტუციო ცვლილებები. საარჩევნო სისტემის რეფორმა ჩააგდეს, ამიტომ ეს უკავშირდება ერთი ადამიანი ირგვლივ კანონმდებლობის მორგებას. განწირულია ეს კოალიცია, ცალკე, ერთად, დამარცხებისთვის მომავალ არჩევნებში,’ - განაცხადა ირაკლი ალასანიამ.
„საარჩევნო კოდექსში“ დაგეგმილი ცვლილებების კანონპროექტის განმარტებით ბარათში ნათქვამია, რომ ”საქართველოს პარლამენტის წევრობის კანდიდატად რეგისტრაციის შესახებ შესაბამისი საარჩევნო კომისიისთვის განცხადების წარდგენიდან არა უგვიანეს მეორე დღისა, პრემიერ-მინისტრი დაკავებული თანამდებობიდან უნდა გადადგეს, რაც არ შეესაბამება დემოკრატიული ქვეყნების ტრადიციას. პრემიერ-მინისტრი, როგორც წესი, არჩევნებში გამარჯვებული პარტიის, საარჩევნო ბლოკის ან მმართველი კოალიციის პოლიტიკური ლიდერია და ახალ საპარლამენტო არჩევნებში შესაბამისს საარჩევნო სუბიექტს წარუძღვება. პრემიერ-მინისტრის მონაწილეობა საყოველთაოდ დაშვებული და გავრცელებული მოვლენაა. გარდა ამისა, საპარლამენტო არჩევნებში მონაწილეობისთვის პრემიერ-მინისტრის სავალდებულო გადადგომა გამოიწვევს მთავრობის გადადგომას და მთავრობის ახალი შემადგენლობის ფორმირების აუცილებლობას. ასეთი ვითარება და საპარლამენტო არჩევნებამდე რამდენიმე კვირით ადრე ახალი მთავრობის ფორმირება, რომელიც შესაძლოა, ორი თვის შემდეგ მთლიანად შეიცვალოს, კონსტიტუციური სისტემის სტაბილურობის სახელმწიფოებრივ ინტერესს არანაირად არ შეესაბამება”.
ცვლილებების ავტორები პარლამენტის წევრები - გიორგი ვოლსკი, ზვიად ძიძიგური და ვახტანგ ხმალაძე არიან, ხოლო ინიციატორები - ზვიად კვაჭანტირაძე და ვახტანგ ხმალაძე.
