,,უვიზო მიმოსვლას მივიღებთ, თუ ივანიშვილი მორიგ დიდი მასშტაბის მავნებლობას არ ჩაიდენს”, - ამის შესახებ ,,ნაციონალური მოძრაობის“ საგარეო ურთიერთობათა მდივანი გიგა ბოკერია მმართველი გუნდის მიერ EPP-ის პრეზიდენტის კრიტიკასთან დაკავშირებით აცხადებს.
ჯოზეფ დაულიმ ტელეკომპანია რუსთავი 2-თან ინტერვიუში იმ კრიტერიუმებზე ისაუბრა,რომლის მიხედვითაც ევროპარლამენტში მისი პარტია მხარს დაუჭერს საქართველოსთვის ვიზების ლიბერალიზაციას. მისი თქმით, EPP-ს მხარდაჭერა დამოკიდებულია საქართველოში საპარლამენტო არჩევნებზე, რასაც მმართველი გუნდის წევრების მხრიდან მწვავე კრიტიკა მოჰყვა. ჟოზეფ დაული ,,ნაცინალურ მოძრაობასთან“ და ყოფილ პრეზიდენტთან გარიგებაში დაადანაშაულეს.
ენმ-ში აცხადებენ, რომ თუ საქართველოს მთავრობა იმსახურებს კრიტიკას ევროპელი პოლიტიკოსების მხრიდან ვიზა ლიბერალიზაციასთან დაკავშირებით, ეს გამომდინარეობს სწორედ საქართველოს მთავრობის სუსტი პოზიციიდან.
“ქართული საზოგადოება იმსახურებს უვიზო მიმოსვლას ევროპაში და მთელმა საზოგადოებამ ჩვენც მათ შორის ყველაფერი გავაკეთეთ, მაგრამ ქვეყანას საერთაშორისო ასპარესზე წარმოადგენს მისი მთავრობა. სამწუხაროდ ჩვენ გვყავს ივანიშვილის მთავრობა, რომელმაც თავისი მავნებლობით და სიზარმაცით ჯერ ორი წელი დაგვაკარგინა, ახლა კითხვის ნიშნები გააჩინა და აგრძელებს ოპონენტების მხარეს ხელის გაშვერას. ამის მიუხედავად იმედი მაქვს, რომ მივიღებთ უვიზო მიმოსვლას თუ ივანიშვილი მორიგ დიდი მასშტაბის მავნებლობას არ ჩაიდენს,“ - აღნიშნა ბოკერიამ.
