ახალგაზრდა იურისტთა ასოციაციის თავმჯდომარის ანა ნაცვლიშვილის შეფასებით, თამაზ მეჭიაურმა ფარულ კადრებთან დაკავშირებით ჩადენილი დანაშაულის ლეგიტიმაცია და ასეთი ტიპის კომპრომატების შეგროვების წახალისება მოახდინა.
,,მან თქვა, რომ ადამიანებმა, რომლებზეც კომპრომატები არსებობს, უნდა დატოვონ პოლიტიკური და საჯარო ცხოვრება. ამით მან სრულიად განსხვავებული პოზიცია დააფიქსირა პრემიერის და მმართველი გუნდის პოზიციისგან, მაგრამ მისი პოზიცია საეჭვოდ დაემთხვა ვიდეოების გამავრცელებლების პოზიციას. რა თქმა უნდა, ჩნდება არაერთი კითხვა საზოგადოებაში. ეს განცხადება ლეგიტიმაციას უკეთებს უკვე ჩადენილ დანაშაულს და ამით ის პირდაპირ მესიჯს აგზავნის იმ პირების მიმართ ვინც შეიძლება ახლა ახდენდეს მსგავსი ტიპის ჩანაწერების წარმოებას ან მომავალში ფიქრობდეს მათ კომპრომატებად გამოყენებას. თუ ასეთი ტიპის კომპრომატები მოგროვდება, მარტივად შესაძლებელია გასუფთავდეს პოლიტიკური სივრცე და ვიღაცისთვის სასურველი განლაგება ვიხილოთ პოლიტიკურ სივრცეში", - განაცხადა ნაცვლიშვილმა.
შეგახსენებთ, ფარულ ვიდეოკადრებთან დაკავშირებულ სკანდალს თამაზ მეჭიაური გუშინ გამოეხმაურა. პრესკონფერენციაზე მან განაცხადა, რომ თანამდებობის პირებმა, რომლებზეც მაკომპრომატირებელი ჩანაწერი არსებობს, თანამდებობები უნდა დატოვონ.
დეპუტატი მიიჩნევს, რომ ხელისუფლება თავის დროზე არ უნდა ჩართულიყო კამპანიაში, რომელიც კადრების განადგურებას გულისხმობდა, რადგან ეს კადრები ყოფილ ხელისუფლებას რამდენიმე ეგზემპლიარად ექნებოდა გამრავლებული.
