ფარულ ვიდეოჩანაწერებთან დაკავშირებულ სკანდალს თამაზ მეჭიაური გამოეხმაურა. დღეს გამართულ პრესკონფერენციაზე მან განაცხადა, რომ თანამდებობის პირებმა, რომლებზეც მაკომპრომატირებელი ჩანაწერი არსებობს, თანამდებობები უნდა დატოვონ.
დეპუტატი მიიჩნევს, რომ ხელისუფლება თავის დროზე არ უნდა ჩართულიყო კამპანიაში, რომელიც კადრების განადგურებას გულისხმობდა, რადგან ეს კადრები ყოფილ ხელისუფლებას რამდენიმე ეგზემპლიარად ექნებოდა გამრავლებული.
,,ფაქტიურად განადგურდა მხოლოდ ის კადრები, რომლებიც სამინისტროში არსებობდა, დანარჩენი ქვეყნიდან იქნება გატანილი, ზოგი ალბათ აქაც არის შენახული. სწორად მიმაჩნდა, რომ მაშინვე ბოლომდე მისულიყო გამოძიება. ასეთ რამეს ვერავინ გაბედავდა უმაღლესი თანამდებობის პირების მხარდაჭერის ან უშუალო მონაწილეობის გარეშე. ყველაფერს თავისი სახელი უნდა დარქმეოდა. დანაშაულები უნდა დაყოფილიყო სიმსუბუქის და სიმძიმის მიხედვით, უნდა ჩამოგვეწერა დანაშაულების ნაწილი, უნდა გვცოდნოდა, რომ ამა თუ იმ ადამიანმა ჩაიდინა დანაშაული, ვაპატიებდით, ხოლო უნდა დასჯილიყო ამ ამბის შემოქმედი. თვალთვალის ობიექტი მაშინ ყველა ვიყავით. ჩემზე თუ რაიმეს გავრცელება უნდათ, გაავრცელონ, მე არაფრის მეშინია. ისეთს ვერაფერს გამივრცელებენ, რომ ძალიან შემრცხვეს. შეიძლება ერთი-ორ ძალიან შინაურ ადამიანს ვაწყენინო", - აღნიშნა დეპუტატმა.
მისივე თქმით, ამაზრზენია, როცა ვიღაცის საძინებელს უთვალთვალებ, მაგრამ მეჭაურის განცხადებით, ეს არ ნიშნავს, რომ ვიდეოების მონაწილე ყველა პერსონაჟი გმირია.
,,მე თავს წმინდანად არ მივიჩნევ, რომ ვინმეს ასეთ საკითხებზე მივუთითო, ვინ რა უნდა აკეთოს და ვინ ვისთან იაროს, მაგრამ არსებობს მეორე კატეგორია, უმაღლესი თანამდებობის პირები, ისინი ვინც თანამდებობებს იკავებს და ისინი, ვისაც თანამდებობის დაკავება სურს, თუ ვინმეზე არსებობს ასეთი მაკომპრომეტირებელი მასალა, უნდა გადადგნენ", - აღნიშნა თამაზ მეჭიაურმა.
