შპს "ტელეკომპანია მაესტროს" დირექტორ ბაჩო კიკაბიძეს სახელწოდება "მაესტროს" გამოყენების უფლება აეკრძალა. შესაბამისი გადაწყვეტილება თბილისის საქალაქო სასამართლომ დღეს მიიღო,
შპს "ტელეკომპანია მაესტროს" დირექტორი აღნიშნულ ფაქტს ეხმაურება და აცხადებს, რომ იგივე სარჩელზე იგივე მოსამართლემ გუშინ სხვა გადაწყვეტილება მიიღო. ბაჩო კიკაბიძის თქმით, "მაესტროს" ვერ გააჩერებენ და მაუწყებლობა არც ერთი წუთით არ შეწყდება.
,,მოხდა უპრეცედენტო ფაქტი. სასამართლომ გუშინ მიიღო ერთი გადაწყვეტილება და დღეს, ზეწოლის შემდეგ მიიღო მეორე გადაწყვეტილება. შემეზღუდა დროებით "მაესტროს" სახელის გამოყენება. ეს იგივეა, რომ ადამიანს შეუზღუდო ვიღაცის გამო თავის შვილს არ დაუძახოს სახელი, ვიდრე არ გაირკვევა. აბსოლუტური აბსურდი მოხდა. ასეთი რამ არც ერთი ხელისუფლების დროს არ მომხდარა. სასამართლო ემსგავსება მხოლოდ შენობას, სადაც არის საოფისე ფართები. შეგიძლიათ მიხვიდეთ და იქირაოთ ის. მე მინდა ვთქვა, მაყურებლების და "მაესტროს" თანამშრომლების საყურადღებოდ, "მაესტროს" ვერ გააჩერებენ მანამ, სანამ იმ ადამიანებს, ვინც 20 წლის განმავლობაში "მაესტროს" აკეთებდა, პირში სული უდგას და ცოცხლები არიან. ასეთი რამ წარმოუდგენელია. შემიზღუდავენ სახელის გამოყენებას? მაუწყებლობას ვერ გამიჩერებენ. მე ილიას დამიძახებენ თუ ბაჩოს - ორივე სახელზე ვიყურები და გისმენთ. არც ერთი წამით არ შევაჩერებთ მაუწყებლობას", - აღნიშნა კიკაბიძემ.
