საპარლამენტო უმრავლესობის დეპუტატი ზაქარია ქუცნაშვილი ინტერნეტში პირადი ცხოვრების ამსახველი ფარული ჩანაწერის გამოქვეყნების მორიგ ფაქტს ეხმაურება და აცხადებს, რომ თანამედროვე ციფრულ სამყაროში საინფორმაციო არხების კონტროლი საკმაოდ რთულია. მისი თქმით, ჰუსეინმა და პუტინმაც კი ვერ შეძლეს საინფორმაციო სივრცის ბოლომდე ჩაკეტვა.
სადამ ჰუსეინი რომ სადამ ჰუსეინია, მან ვერ შეძლო ერაყის საინფორმაციო სივრცე თავიდან ბოლომდე ჩაეკეტა არასასურველი ინფორმაციისაგან. თქვენ წარმოიდგინეთ, რა ცენზურითა და ინსტრუმენტებით იყო შეიარაღებული ეს დიქტატორი თავის ქვეყანაში. პუტინი რომ პუტინია, მას უჭირს რუსეთში საინფორმაციო სივრცის ჩაკეტვა. სოციალური ქსელები და ინტერნეტი ამის ძალიან კარგი საშუალებაა. შეგახსენებთ ცნობილ კამპანიას, რაც "ვიკილიქსმა" აწარმოა – ამერიკისა და დიდი ბრიტანეთის მთავრობებმაც კი ვერ შესძლო აღეკვეთა ის, რასაც "ვიკილიქსი" აკეთებდა, როცა სახელმწიფო საიდუმლო ინფორმაცია სამზეოზე გამოჰქონდა", - აცხადებს ქუცნაშვილი.
მისივე თქმით, აღნიშნული ჩანაწერები სავარაუდოდ, "ქართული ოცნების" ხელისუფლებაში მოსვლამდეა გადაღებული, რადგან, წინა ხელისუფლების დროს ამ თემით დაინტერესებული სპეციალური სამსახურები მოქმედებდნენ.
