პარლამენტის თავმჯდომარე დავით უსუფაშვილი აცხადებს, რომ თავდაცვის მინისტრის დაცვა გაუჭირდება, თუმცა გარკვეულ გარემოებებზე მიანიშნებს. ჟურნალისტებთან დღეს გამართულ შეხვედრაზე უსუფაშვილი საგარეჯოს შუალედურ არჩევნებზე დაწყებულ გამოძიებას გამოეხმაურა და აღნიშნა, რომ თინა ხიდაშელი საჯარო დებატებში სწორედ მაშინ ჩაერთო, როდესაც კითხვები პროკურატურის მხრიდანაც გაჩნდა.
„თავდაცვის მინისტრის დაცვა გამიჭირდება - ამას არ გავაკეთებ. უბრალოდ, მიგანიშნებთ იმ ფაქტზე, რომ თავდაცვის მინისტრი არ ჩართულა საჯარო დებატებში საკითხზე, რომელიც ვთქვათ, ყურძნის მოსავალს ეხებოდა. თავდაცვის მინისტრი ჩართული აღმოჩნდა საჯარო დებატებში იმ საკითხზე, რომელიც უშუალოდ მის კომპეტენციაში და მის უწყებაში შემავალ საკითხებს უკავშირდებოდა. ამიტომ მთლად გვერდზე გასვლა ამ თემიდან შეუძლებელი იყო. გარკვეული საჯარო აქტიურობა უფრო მოყვა იმას, რომ კონკრეტული ბრალდებები წამოვიდა არა მხოლოდ პოლიტიკური ოპონენტის თუ უმრავლესობაში შემავალი პირების მხრიდან, არამედ საქართველოს პროკურატურის მხრიდან, როცა პროკურატურა საქმეში ჩაერთო“, - განაცხადა უსუფაშვილმა.
იგი დადებითად აფასებს საკითხში პრემიერ-მინისტრის ჩართვას.
,,პრემიერ-მინისტრის, მინისტრის და ჩვენი მცდელობითაც ეს საკითხები არის გადასული იმ ჩარჩოში, რომელშიც აღმოჩნდა. ცალკე საკითხია იყო თუ არა რაიმე გასარკვევი, სწორი იყო თუ არა რაიმეს საერთოდ დაწყება, ვის რა პოლიტიკური ინტერესი აქვს - დღეს ამ ვითარებაში ვართ, ამიტომ ყველა თანამდებობის პირმა ჩვენი საქმის კეთება უნდა გავაგრძელოთ, რადგან საქმეში ის თანამდებობის პირები ჩაერთვნენ, რომელთაც მეტი კითხვის დასმის უფლება და საშუალება აქვთ”, - დასძინა პარლამენტის თავმჯდომარემ.
