საპარლამენტო უმცირესობის წევრის აკაკი ბობოხიძის განცხადებას, რომ სოფელ დიდ ჯიხაიშში საზოგადოებრივი ცენტრის მშენებლობის დროს დასაქმებულ მუშებს ხელფასები არ მიუღიათ, საქართველოს იუსტიციის მინისტრი თეა წულუკიანი ეხმაურება. შესაბამის პოსტს თეა წულუკიანი სოციალურ ქსელში აქვეყნებს.
“მშენებლობა დასრულდა” – გარედან რომ შეხედა „ნაციონალის“ გამჭრიახმა თვალმა, შენ დაგენაცვლა ამბის მომტანი, კაკო. ობიექტი კი არ დასრულებულა. რასაც მე ვეძახი დასრულებას, თვარა, აბა, თქვენ რასაც ეძახით დასრულებას, კი ვიცი – დღესაც ვასწორებ შენი რჩეული, შენი ნაფერები და ქვეყნიდან თავქუდმოგლეჯით გაქცეული იუსტიციის მინისტრის ნაშენებ-ნაფერებ-ნარუდუნებ თბილისის იუსტიციის სახლის გაგრილება-კონდიცირება-სახურავ-სანიაღვრე-პარკინგებს. ისე, ჩემებმა შანიძნებში იციან და მეც გამოვიყენებ ამ გამოთქმას – ნეტაი, იმის ტურა მქნა და გამაგებინა, შენი ნაფერები და კიევში გაქცეული რომ თბილისის იუსტიციის სახლს აშენებდა და მუშები სახურავიდან ცვიოდნენ (ხელფასს ვინ დაეძებდა), მაშინ რამე თქვი, კაკო? არა?! ხოხ, შეგირცხვა ცხვირ-პირი, კაკო! ჰოდა, რაკი ობიექტი ჯერ არ ჩაბარებულა და, შესაბამისად, არ დასრულებულა, სერვისების განვითარების სააგენტო (ეს რომელია, იცი, აი, ვაშაძე რომ იყო უფროსი, ის) ვერ გადაუხდის სამშენებლო კომპანიას დარჩენილ თანხას.
მიღება-ჩაბარება ხომ იცი, აი ის უნდა გაფორმდეს. როდის გაფორმდება? როცა დავინახავ, რომ დასრულდა. მე რასაც დასრულებას ვეძახი, თვარა, შენი ჭირიმე, წვიმა რომ სახურავიდან მილში კი არ მიდის, კედელზე ჩამოდის და ჩამოწანწკარდება და შტეფსელიდან კომპიუტერს რომ გამორთავ და შტეფსელიც კედლიდან გამოდის და სახლში მოგყვება, ეს დასრულება არ არის, კაკო”, – წერს იუსტიციის მინისტრი სოციალურ ქსელში თავის გვერდზე.
მისივე თქმით, თუმცა, ამ დარჩენილი თანხის მიუხედავადაც შეუძლია სამშენებლო კომპანიას, რომ თავის მუშებს ხელფასი ჩაურიცხოს.
“296.825 ლარი მაქვს ჩარიცხული და როგორ ვერ მონახა საკუთარი მუშისთვის გადასახდელი ხელფასი? 10.025 ლარი დამრჩა ჩასარიცხი და იმას რომ გამოასწორებს, რაც ზევით წერია, მერე გადავუხდი, კაკო. მუშა როდის იყო ამგვარ კომპანიას აინტერესებდა, ძლივს ააშენა 9 თვეში 4 თვეში ასაშენებელი (ხო, ხო, არ დამიბარებია ციხეში ჩაგსვამ-მეთქი, საპროცესოს მოგანატრებ-მეთქი, გლდანში ცოცხით საკანს დირექტორის კაბინეტს დაგაგვევინებ-მეთქი, თვარა, ეგება და, კი დაესრულებინა 4 თვეშიც). ასეა თუ ისეა, საკუთარ საქმეს მიხედე, კაკო. ჰო, და კიდევ, გახსნაზე გეპატიჟები. მინდა, ვნახო, დიდ ჯიხაიშში რა რეიტინგი გაქვს, კაკო. ბავშვმაც თუ იცის, ეს მაინტერესებს”, – აღნიშნავს წულუკიანი.
საპარლამენტო უმცირესობის წევრის, აკაკი ბობოხიძის ინფორმაციით, სოფელი დიდ ჯიხაიშში, საზოგადოებრივი ცენტრის მშენებლობის დროს დასაქმებულ მუშებს ხელფასები არ მიუღიათ. ამის შესახებ ბობოხიძემ დღეს პარლამენტის პლენარულ სხდომაზე განაცხადა და იუსტიციის მინისტრს, თეა წულუკიანს საქმით დაინტერესებისკენ მოუწოდა.
