პარლამენტის ვიცე-სპიკერის მანანა კობახიძის შეფასებით, საგარეჯოში ჩატარებულ არჩევნებთან დაკავშირებით გამოძიების დაწყება ხელისუფლებისთვის საამაყო არ არის. თუმცა მისი თქმით, პროკურატურას სხვა გზა არ ჰქონდა.
,,რა თქმა უნდა, ეს არ არის კარგი და ხელისუფლებისთვის მანცდამაინც საამაყო. სხვა გზა ალბათ არ აქვს პროკურატურას, როცა საჯაროდ ასეთი სახის განცხადებები ვრცელდება.
უმჯობესია, რომ ერთხელ და სამუდამოდ, პასუხი გაეცეს, რა მოხდა სინამდვილეში. რა თქმა უნდა, ირაკლი შოთაძე როგორც მთავარი პროკურორი, თავად არის პასუხისმგებელი იმ ქმედებებზე, რომელიც ხორციელდება პროკურატურის მხრიდან და როგორც ჩანს, ეს მისი გადაწყვეტილებაა. თუმცა კანონი სხვა შესაძლებლობას მას არც აძლევდა. კანონში პირდაპირ გვიწერია, რომ სავარაუდოდ დანაშაულის შესახებ ინფორმაცია წარმოადგენს საფუძველს იმისა, რომ დაიწყოს ძიება. ეს პროცესი დაწყებულია. ახლა მთავარია, რაც შეიძლება ეფექტურად, სწრაფად, გაჭიანურების გარეშე გაეცეს ამ კითხვებს პასუხი", - განაცხადა მანანა კობახიძემ.
პროკურატურამ საგარეჯოში ჩატარებულ შუალედურ არჩევნებთან დაკავშირებით გამოძიება რამდენიმე დღის წინ დეპუტატ გოგი თოფაძის მიერ თინა ხიდაშელის მიმართ გამოთქმული ბრალდებების გამო დაიწყო.
მასალის გამოყენების პირობები
