შეწყალების კომისიის თავმჯდომარის ზვიად ქორიძე აცხადებს, რომ ეკა ბესელიას მიერ, ალეკო ელისაშვილი მის მიმართ წაყენებულ ბრალდებებთან დაკავშირებით გამოძიება აუცილებლად უნდა დაიწყოს. მისი თქმით, საკმაოდ უპასუხისმგებლოა, როდესაც საზოგადოებას აჯერებენ იმაში, რომ შეიძლება შეწყალების მექანიზმში იყოს გამოყენებული კორუფციისა და სხვადასხვა მანკიერი ხასიათის პროცედურები.
როგორც ქორიძემ აღნიშნა, პარლამენტის ადამიანის უფლებათა დაცვის კომიტეტის თავმჯდომარის ბრალდებები მისთვის უცნობია, რადგან არ იცის, რა საქმეზე და კონკრეტულად, რომელი მსჯავრდებულის წერილზეა საუბარი.
,,რამდენადაც საჯარო სივრცეში ვუსმენდი ალეკო ელისაშვილის საპასუხო განცხადებებს, ის მოითხოვს, რომ ამ თემაზე გამოძიება დაიწყოს, რაც შეიძლება დროულად და ეფექტურად, რადგან თავად არის დარწმუნებული და მე პირადადაც დარწმუნებული ვარ, რომ ასეთ ფაქტს არ შეიძლებოდა ადგილი ჰქონოდა, თუმცა გამოძიება აუცილებლად უნდა წარიმართოს და ყველა ასეთ გაუგებრობას და კითხვას დროულად უნდა გაეცეს პასუხი. ჩემთვისაც, ისევე როგორც ფართო საზოგადოებისთვის, უცნობია, რომელ საქმეზე რომელი მსჯავრდებულის წერილია და რატომ ითხოვდა, თუ ითხოვდა ვინმე, გათავისუფლებისთვის გასამრჯელოს. ეს არის წარმოუდგენელი. მე წელიწადი და რვა თვეა, ამ კომისიის ხელმძღვანელი ვარ. მანამდე კომისიის წევრი ვიყავი. მინდა კიდევ ერთხელ დავარწმუნო საზოგადოება და პირველ რიგში, დავარწმუნო თავად მსჯავრდებულები, რომ ეს პრაქტიკა ბუნებაში არ არსებობს“, - განაცხადა ზვიად ქორიძემ.
ეკა ბესელიას განცხადებით, მსჯავრდებულისგან მიიღო წერილი, სადაც ალეკო ელისაშვილის შეწყალების კომისიის თავმჯდომარეობის პერიოდში, უკანონო ფაქტებთან დაკავშირებითაა საუბარი. მისი თქმით, მსჯავრდებულმა მას მიაწოდა ინფორმაცია, რომ ელისაშვილი დადებითი რეკომენდაციის სანაცვლოდ, ადვოკატს 50 000 ლარი მოსთხოვა.
