,,რესპუბლიკური პარტიის“ წევრი, საია-ს ყოფილი თავმჯდომარე თამარ ხიდაშელი "ნაციონალური მოძრაობის" ბრალდებებს პასუხობს და აცხადებს, რომ 2008 წელს, საქართველოს სახელმწიფოს მხრიდან ადგილი ჰქონდა თანამოქალაქეების უფლებების დარღვევას. მისი თქმით, ისევ იმ პოზიციაზე, რჩება, რომ ადამიანის უფლებებს ეთნიკურობა არა აქვს.
საქმე ეხება "ნაციონალური მოძრაობის" მიერ ანა დოლიძისა და საია-ს მიმართ დღეს გახმაურებულ ბრალდებებს, რომ 2008 აგვისტოს ომთან დაკავშირებულ საქმეებზე, როგორიცაა, მაგალითად, "სიპოლსი საქართველოს წინააღმდეგ", ახალგაზრდა იურისტთა ასოციაცია რუსეთის მოქალაქეების ინტერესებს იცავდა.
"მე ვიყავი საქართველოს ახალგაზრდა იურისტთა ასოციაციის თავმჯდომარე, როდესაც ეს საქმე გაიგზავნა ევროპის ადამიანის უფლებათა სასამართლოში. მაშინაც ამ პოზიციაზე ვიყავი და დღესაც შესაბამის პოზიციაზე ვრჩები, რომ ამ შემთხვევაში საქართველოს სახელმწიფოს მხრიდან ადგილი ჰქონდა ჩვენი თანამოქალაქეების უფლებების დარღვევას. მე ვფიქრობ, ადამიანის უფლებებს ეთნიკურობა არა აქვს, შესაბამისად, ეს საქმეები ნამდვილად იყო გასასაჩივრებელი ადამიანის უფლებათა ევროპულ სასამართლოში და დღესაც მოუთმენლად დაველოდები ამ საქმეზე გადაწყვეტილების გამოტანას", - განაცხადა ხიდაშელმა.
