თავისუფალი დემოკრატების“ ლიდერ ირაკლი ალასანიას განცხადებით, ალექსი პეტრიაშვილის დაჭრის ფაქტი ნიშნავს, რომ ქვეყანაში სრული განუკითხაობაა.
„ეს თავზარდამცემი ამბავი ცხადყოფს, რომ დღეს ქვეყანაში სრული განუკითხაობაა. როდესაც ასეთი თავდასხმა ხორციელდება ერთ-ერთი პოლიტიკური ძალის გენერალურ მდივანზე, როდესაც ასეთი ლაჩრული ჩასაფრებით, მეგობრის საფლავზე მისულ ადამიანს ხუთი ცეცხლნასროლი ჭრილობა მიაყენეს, ეს მეტყველებს იმაზე, რომ ჩვენს ქვეყანაში ყველა მოქალაქე არის დაუცველი. მეგობრის საფლავზე იყო მისული, დღეს პრაქტიკულად მეორეჯერ გარდაიცვალა ლევან მიქელაძე, მის საფლავზე მის მეგობარს ასე გაუსწორდნენ“, - განაცხადა ალასანიამ „პირველის“ ეთერში.
მან ხელისუფლებასა და შსს-ს მოუწოდა ძალ-ღონე არ დაიშურონ ობიექტური ჭეშმარიტების დროულად დასადგენად.
რაც შეეხება მომხდარის მოტივებს, ალასანია ამასთან დაკავშირებით არ საუბრობს და აცხადებს, რომ აღნიშნულს გამოძიება დაადგენს.
დღეს, საბურთალოს რაიონში, უცნობმა პირებმა „თავისუფალი დემოკრატების“ წარმომადგენელს ალექსი პეტრიაშვილს ფიზიკური შეურაცხყოფა მიაყენეს და ცეცხლსასროლი იარაღიდან გასროლით ორივე ქვედა კიდური დაუზიანეს. შემთხვევა საბურთალოს პანთეონის ძმათა სასაფლაოს ტერიტორიაზე მოხდა. შინაგან საქმეთა სამინისტროს თბილისის პოლიციის დეპარტამენტმა გამოძიება საქართველოს სისხლის სამართლის კოდექსის 117-ე მუხლით დაიწყო, რაც ჯანმრთელობის განზრახ მძიმე დაზიანებას გულისხმობს.
