საქართველოს პრეზიდენტის მრჩეველი ფიქრია ჩიხრაძე აცხადებს, რომ ახლა მოტივზე უფრო საინტერესოა, ვინ გაბედა დღისით, მზისით, ასეთი დანაშაულის ჩადენა. ამის შესახებ მან რესპუბლიკურ საავადმყოფოსთან განაცხადა, სადაც "თავისუფალი დემოკრატების" ერთ-ერთ ლიდერს ალექსი პეტრიაშვილს ოპერაცია უტარდება.
"უპირველეს ყოვლისა, ჩვენ გვაინტერესებს მისი ჯანმრთელობის მდგომარეობა და რაც მთავარია, ყველასთვის ძალიან მნიშვნელოვანია, რომ უსწრაფესად იქნას ეს საქმე გამოძიებული იმიტომ, რომ დღისით, მზისით, ხილულად ასეთი დანაშაული ჩადენა როგორღაც მიანიშნებს იმაზე, რომ კრიმინალური თვალსაზრისით, ამ ქვეყანაში რაღაც არ არის სწორად და კარგად. ვერანაირ კვალიფიკაციას და შეფასებას მე ბუნებრივია ვერ გავაკეთებ.. ამ წუთში მოტივზე უფრო მეტად საინტერესოა, რა მოხდა და ვინ იყვნენ ისინი, ვინც გაბედეს, რომ ასეთი ქმედება ჩაედინათ. ეს სროლა ისეთ გარემოებებშია ჩადენილი, რომ იმედი მაქვს, სამართალდამცველი ორგაოები კვალზე მალე გავლენ და ძალიან მალე საზოგადეობას ეცოდინება, რასთან გვაქვს საქმე", - აღნიშნა ჩიხრაძემ "რუსთავი 2"- თან საუბარში.
თბილისში, საბურთალოს რაიონში, უცნობმა პირებმა ალექსი პერტიაშვილს ფიზიკური შეურაცხყოფა მიაყენეს და ცეცხლსასროლი იარაღიდან გასროლით ორივე ქვედა კიდური დაუზიანეს. ექიმენის განცხადებით, მას დაზიანებები თავის არეშიც აქვს მიყენებული.
