დამოუკიდებელ საგამოძიებო ორგანოს შექმნის შემთხვევაში, არჩეული კომისარი 7 წლის ვადით უხელმძღვანელებს. კანონპროექტის ავტორები მიიჩნევენ, რომ დამოუკიდებელი საგამოძიებო ორგანო დაახლოებით 30-40 ადამიანით უნდა იყოს დაკომპლექტებული.
ფონდ "ღია საზოგადოება - საქართველოს" წარმომადგენელმა, ნიკა ჯეირანაშვილმა ჟურნალისტებთან განაცხადა, რომ აქ არ არის საუბარი ცალკე სამინისტროს ან ცალკე პროკურატურის შექმნაზე.
"იქმნება პატარა, მაგრამ ეფექტური და ძლევამოსილი ინსტიტუტი, რომელიც იქნება ახალი ორგანო. ის არ იქნება რომელიმე უწყების ქვეშ, ანუ იქნება დამოუკიდებელი. მას ეყოლება ხელმძღვანელი, რომელსაც პირობითად დავარქვით კომისარი. კომისარს ეყოლება თავისი გამომძიებლები და პროკურორები", - აღნიშნა ჯეირანაშივილმა.
მისივე თქმით, აღნიშნულ ორგანოს უფლება ექნება როგორც გამოძიება დაიწყოს, ასევე აწარმოოს სისხლის სამართლებრივი დევნა იმ დანაშაულებებზე, რომლებიც ჩადენილი იქნება სამართალდამცველი ორგანოების წარმომადგენლების მიერ.
ჯეირანაშვილის განმარტებით, ამ ორგანოს, დაფინანსების ძირითადი წყარო იქნება ბიუჯეტი, თუმცა საწყის ეტაპზე მას ექნება უფლება, რომ სახსრები მიიღოს ასევე საერთაშორისო დონორი ორგანიზაციებიდან.
კონფერენციას, სადაც აღნიშნული კანონპროექტი განიხილება, სასჯელაღსრულების მინისტრი კახა კახიშვილი, იუსტიციის მინისტრი თეა წულუკიანი, დეპუტატები, არასამთავრობო და საერთაშორისო ორგანიზაციის წარმომადგენლები, ექსპერტები ესწრებიან.
