,,იბერიის”საინფორმაციო სამსახურის ყოფილი უფროსი, ლუბა ელიაშვილი აცხადებს, რომ ტელეკომპანიაში პირველი ,,შემოვარდნისას გენერალური პროკურორი იყო ირაკლი ოქრუაშვილი“. მისი თქმით, სწორედ ოქრუაშვილი გამოდიოდა ბრალდებებით, რომლებიც შემდგომ არ დადასტურდა.
„პირველად, როდესაც მოხდა შემოვარდნა, გენერალური პროკურორი იყო ირაკლი ოქრუაშვილი და სწორედ ის გამოდიოდა საშინელი ბრალდებებით, რომელიც შემდეგ არცერთი არ დადასტურდა. მაგრამ, ძალიან მალე გამოიცვალა პროკურორი და გახდა ზურაბ ადეიშვილი და ამ საქმის ძიებას მთელი ბიზნესის წინააღმდეგ უძღვებოდა მისი მოადგილე გიორგი ლაცაბიძე,“ - აცხადებს ლუბა ელიაშვილი.
ის მიიჩნევს, რომ ამ საქმეზე ბრალი უნდა წარედგინოს ირაკლი ოქრუაშვილსაც და საქართველოს ყოფილ პრეზიდენტს, მიხეილ სააკაშვილსაც.
იუსტიციის ყოფილ მინისტრს ზურაბ ადეიშვილს და მის ყოფილ მოადგილეს გიორგი ლაცაბიძეს ტელეკომპანია ,,იბერიის” დახურვის ფაქტზე ბრალი დღეს წაუყენეს.
საუბარია 2004 წელს, ტელეკომპანიისთვის სამაუწყებლო ლიცენზიის იძულებით ჩამორთმევაზე. სპეციალური განმარტება ამ საქმეზე დღეს მთავარ პროკურატურაში გააკეთეს.
