,,მოსამართლეთა რაოდენობის ძალიან დიდი სიმცირეა და მათი დანიშვნის შეჩერება მიუღებელია“ - ამის შესახებ ჟურნალისტებს იუსტიციის უმაღლესი საბჭოს თავმჯდომარემ ნინო გვენეტაძემ პრეზიდენტის მრჩევლების განცხადებების შეფასებისას განუცხადა.
,,შეჩერება არ არის რეფორმა, რეფორმა არის გამჭვირვალობის წესის და სხვა კრიტერიუმების ნათლად გაწერა. იუსტიციის უმაღლეს საბჭიოს დანიშვნის შეჩერების უფლება არ აქვს, ამასთან, როდესაც არის ვაკანსიები და მოსამართლეთა რაოდენობის ძალიან დიდი სიმცირეა, შეჩერება არის მიუღებელი," - განაცხადა გვენეტაძემ.
მისივე თქმით, აღნიშნულ საკითხზე არასამთავრობო ორგანიზაციების მიერ პოზიცია დაფიქსირებულია საკონსტიტუციო სასამართლოში და საბჭო სასამართლოს გადაწყვეტილების შესაბამისად იმოქმედებს.
პრეზიდენტის მრჩეველმა ადამიანის უფლებათა საკითხებში კახა კოჟორიძემ არასამთავრობო ორგანიზაციებთან შეხვედრის შემდეგ განაცხადა, რომ მოსამართლეთა შერჩევა-დანიშვნის ხარვეზებიანი პროცესი უნდა შეჩერდეს. როგორც კოჟორიძემ აღნიშნა, პარლამენტმა დაუყოვნებლივ უნდა დაიწყოს სისტემური რეფორმების გატარება.
