დღეს ლარი შედარებით გამყარდა და იმედი გვაქვს, საშუალო ვადიან პერიოდში, ეროვნული ვალუტა სერიოზულად გამყარდება. ამის შესახებ გადაცემა 2030-ში საქართველოს ფინანსთა მინისტრმა, ნოდარ ხადურმა განაცხადა.
მისივე თქმით, რეგიონში რთული ვითარებაა, შარშან ამ დროს ვერავინ წარმოიდგენდა, რომ აზერბაიჯანში ასეთი მდგომარეობა შეიქმნებოდა. რუსული რუბლი სამჯერ გაუფასურდა, ლირა-ორჯერ და მეტად, ასევეა მანათიც.
„საგარეო ფაქტორები ერთია, მაგრამ არსებობს საშინაო ფაქტორებიც. ყველაფერს ვაკეთებთ, რომ საქართველო ინვესტიციების პლაცდარმი გახდეს. ჩინეთის პრეზიდენტთან და პრემიერთან ნაყოფიერი შეხვედრა მქონდა და გეტყვით, რომ მათი საქართველოსადმი დამოკიდებულება პოზიტიურია.მთავრობის სხდომაზე გავიტანეთ ორი საკითხი. ერთ შემთხვევაში, ესაა 40 მილიონი, რომელიც 260 კილომეტრი გზის რეაბილიტაციას მოხმარდება და მეორე - 4 მილიარდ 410 მილიონი იაპონური იენის ინვესტიცია, რომელსაც საგზაო ინფრასტრუქტურის გასაუმჯობესებლად მივიღებთ. საერთაშორისო საფინანსო ორგანიზაციები მზად არიან, ავტობანის მშენებლობისთვის 800 მილიონი დოლარის ინვესტიცია განახორციელონ“,-აღნიშნა ხადურმა.
