ექსპერტი, პაატა ზაქარეიშვილი "ჯი-ეიჩ-ენთან" საუბარში აცხადებს, რომ რუსეთს ჩრდილოეთ კავკასიაში სამხედრო კონტინგენტის გაზრდა ჩრდილოეთ კავკასიაში სტაბილიზაციისათვის სჭირდება.
პაატა ზაქარეიშვილის განცხადებით, ბოლო დროს რეგიონში განხორციელებული ტერაქტები იმის საფუძველს იძლევა, რომ შესაძლოა სიტუაცია უკონტროლო გახდეს და ამის თავიდან ასაცილებლად რუსეთი შესაბამის ღონისძიებებს ატარებს.
ექსპერტს მიაჩნია, რომ ჩრდილოეთკავკასიაში სტაბილიზაციის დასამყარებლად რუსეთის მხრიდან სამხედრო ჩარევა არაეფექტური იქნება.
"აღნიშნული ინფორმაცია გაავრცელა "ნეზავისიმაია გაზეტამ" და რამდენად სწორია ეს ინფორმაცია, ჯერ კიდევ დასაზუსტებელია. ეს არ არის სახელმწიფო სტრუქტურებიდან, ანუ თავდაცვის სამინისტროდან გაკეთებული განცხადება. ნებისმიერ შემთხვევაში, ეს მეტყველებს იმაზე, რომ პრობლემები არის ჩრდილოეთ კავკასიაში რუსეთისთის და ალბათ მას სხვა გზა არ რჩება და ცდილობს გაამყაროს თავისი პოზიციები იქეედან გამომდინარე, რომ იქ ყოველდღე ხდება ტერაქტები და უკონტროლო სიტუაცია შეუქცევად მდგომარეობაში შეიძლება გადაიზარდოს. ალბათ ამ ფორმით რუსეთს სურს, რომ იქ რუსეთის სახელმწიფო ინტერესები გაამყაროს. რამდენად გამოუვათ ჯარით ამისი გაკეთება, მე ეჭვი მეპარება, მაგრამ ალბათ ეს მოტივაციაა. ", _ განუცხადა "ჯი-ეიჩ-ენს" პაატა ზაქარეიშვილმა.
ექსპერტი მიიჩნევს, რომ სამხედრო კონტინგენტის გაზრდის მეორე მოტივი შესაძლოა იყოს რუსეთის სურვილი _ საქართველოს საზღვართან მუდმივად მზადყოფნაში ჰყავდეს შეიარაღებული ძალები. რაც შეეხება გაზრდილი შეიარაღების გამოყენებას საქართველოს წინააღმდეგ, ექსპერტი მიიჩნევს, რომ ნაკლებადსავარაუდოა, რომ რუსეთმა გაზრდილი სამხედრო კონტინგენტი საქართველოს წინააღმდეგ მიმართოს.
"მეორე ალბათ ის ფაქტორიცაა, რომ რუსეთს სურს მუდმივად ჰყავდეს ჯარი საქართველოს საზღვართან, საჭიროების შემთხვევაში საქართველოში დამატებითი კონტინგენტის შემოსაყვანად. ანუ არ გამოვრიცხავ, რომ ერთ-ერთი ამოცანა ესეც იყოს. მთავარი ამოცანა მე მაინც პირველი მგონია, ანუ ჩრდილოეთკავკასიაში სტაბილიზაციისა და წესრიგის დამყარება, მაგრამ ერ-ერთ ვარიანტად ისიც შეიძლება განვიხილოთ, რომ რუსეთმა შესაძლოა გაძლიერებული სამხედრო კონტინგენტი საქართველოში სიტუაციის დაძაბვის შემთხვევაშიც გამოიყენოს", _ განუცხადა "ჯი-ეიჩ-ენს" პაატა ზაქარეიშვილმა.