ერდოღანი რუსეთს აფრთხილებს - ნუ გააგრძელებს ცეცხლთან თამაშს. ანკარას არ სურს მოსკოვთან ურთიერთობების გაფუჭება, მაგრამ მოსკოვს მოუწოდებს, შემდგომაც ნუ გააგრძელებს ცეცხლთან თამაშს, - ამის შესახებ თურქეთის პრეზიდენტმა რეჯებ ტაიიპ ერდოგანმა განაცხადა.
მან ასევე აღნიშნა, რომ თურქმა სამხედროებმა, რომლებმაც მიიღეს გადაწყვეტილება ბომბდამშენის ჩამოგდების შესახებ, არ იცოდნენ თუ რომელ ქვეყანას ეკუთვნოდა ის. თავის მხრივ, რუსეთის პრეზიდენტმა ვლადიმერ პუტინმა უარყო ინფორმაცია იმის შესახებ, რომ თურქულმა მხარემ არ იცოდა თუ ვისი თვითმფრინავი ჩამოაგდო. მან თურქული მხარის განცხადებებს სისულელე და თავის არიდების მცდელობა უწოდა. ერდოღანმა პუტინის კრიტიკას მიუღებელი უწოდა და აღნიშნა, რომ მზად არის პირადად შეხვდეს რუსეთის პრეზიდენტს, ვლადიმერ პუტინს და მასთან ერთად განიხილოვს შექმნილი ვითარება.
თურქეთსა და რუსეთს შორის ურთიერთობის დაძაბვა სამშაბათს თურქეთის მიერ რუსული სამხედრო თვითმფრინავის SU24-ის ჩამოგდებას უკავშირდება. ოფიციალური ანკარის განცხადებით, თვითმფრინავმა თურქეთის საჰაერო სივრცე დაარღვია. მოსკოვი კი, საზღვრის დარღვევას უარყოფს და ამბობს, რომ თვითმფრინავი ჩრდილოეთ სირიაში დაფრინავდა. პრეზიდენტ რეჯეფ ტაიპ ერდოღანის განცხადებით, მათ არ იცოდნენ, რომელი ქვეყნის თვითმფრინავი იყო და მისი პილოტები რამდენჯერმე გააფრთხილეს, თუმცა, მათგან რეაგირება არ ყოფილა.
რუსეთის პრეზიდენტ ვლადიმირ პუტინის თქმით, ეს შემთხვევა იყო "ტერორისტების თანამზრახველების მიერ განხორციელებული დარტყმა". მისივე განცხადებით, აღნიშნული ქმედება რუსეთ-თურქეთის ურთიერთობაზე გავლენას იქონიებს. რუსეთმა თურქეთთან სამხედრო კონტაქტები უკვე გაწყვიტა. საუბარია თურქეთისთვის ეკონომიკური სანქციების დაკისრებაზეც.
