ვლადიმერ პუტინის განცხადებით, თუ მსგავსი ინციდენტი ისევ განმეორდა, რუსეთი არ ითანამშრომლებს არცერთ კოალიციასა და ქვეყანასთან.
მისივე თქმით, რუსეთი მზადაა, ითანამშრომლოს აშშ-ის მიერ შექმნილ კოალიციასთან, რომელშიც თურქეთიც შედის, მაგრამ იგივე ინციდენტი არ უნდა განმეორდეს.
"ჩვენ მზად ვართ, ვითანამშრომლოთ ამერიკის მიერ ე.წ. ისლამურ სახელმწიფოსთან ბრძოლისათვის შექმნილ კოალიციასთან, მაგრამ მსგავსი ინციდენტები აბსოლუტურად მიუღებელია ჩვენთვის და გაფრთხილებთ, რომ თუ მსგავსი ინციდენტი ისევ განმეორდა, ჩვენ არ გვჭირდება თანამშრომლობა არცერთ კოალიციასა თუ ქვეყანასთან," - განაცხადა პუტინმა ფრანსუა ოლანდთან შეხვედრის შემდეგ.
ბარაკ ობამასა და ანგელა მერკელთან შეხვედრების შემდეგ, საფრანგეთის ლიდერი მოსკოვში ჩავიდა და სირიაში ისლამური სახელმწიფოს წინააღმდეგ ბრძოლის სტრატეგიას ვლადიმერ პუტინთან განიხილა.
