ბათუმში ვირუსული მენინგიტის შემთხვევა დაფიქსირდა. 5 წლის დემეტრე ლორთქიფანიძის ჯანმრთელობის მდგომარეობა ამჟამად სტაბილურია, მას დაავადების მსუბუქი ფორმა დაუდგინდა.
ბათუმის №3 საბავშვო ბაღის აღსაზრდელი ამჟამად ინფექციურ საავადმყოფოში მკურნალობს. ოთახი, სადაც ბაღის აღსაზრდელი იმყოფებოდა, დეზინფექციის მიზნით ლიზოფორმინის ხსნარით უკვე დამუშავდა.
ჯგუფი იზოლირებულია და მშობლებს ჯადაცვის სამინისტროს მიერ გადმოცემული მედიკამენტები ურიგდებათ.
მე-3 საბავშვო ბაღში 250 აღსაზრდელი ირიცხება, თუმცა, დღეს დილით მათგან ბაღში მხოლოდ 120 ბავშვი მივიდა.
დაავადების გამოვლენიდან სამი დღის შემდეგ განმეორებითი შემთხვევა არ დაფიქსირებულა. მედიკოსებისა და ბაღის ადმინისტრაციის განცხადებით, პანიკის საფუძველი არ არსებობს.
