პარლამენტის იურიდიულ საკითხთა კომიტეტის თავმჯდომარის, ვახტანგ ხმალაძის განცხადებით, „რუსთავი 2“-ის სარჩელთან დაკავშირებით, საკანონმდებლო ორგანოდან საკონსტიტუციო სასამართლოში გაგზავნილი შუამდგომლობა მხოლოდ პროცესის სამართლებრივ მხარეს ეხება.
როგორც ჟურნალისტებს ხმალაძემ განუცხადა, შუამდგომლობა, რომელიც მისმა წარმომადგენელმა საკონსტიტუციო სასამართლოს პირველ კოლეგიას წარუდგინეს, 12 გვერდიანია.
მისი თქმით, პარლამენტი არა მარტო უფლებამოსილია, არამედ ვალდებულიცაა ყველა ის მექანიზმი გამოიყენოს, რომელიც სასამართლო განხილვისას მხარეს აქვს.
„ამ შემთხვევაში საფუძვლიანი ეჭვი შეგვექმნა, კოლეგიის თავმჯდომარის - ვარძელაშვილისა და კოლეგიის წევრის კოპალეიშვილის არაობიექტურობასა და მიკერძოებულობაზე. შუამდგომლობაში დაწვრილებით აღწერილია მთელი პროცესი რამაც ეჭვის წარმოქმნა გამოიწვია. კერძოდ, პირველი რიგში, ეს წმინდა პროცედურული საკითხებია: „რუსთავი 2“-ის გარდა, იგივე საკითხი კიდევ ორ სუბიექტს ჰქონდა გასაჩივრებული. სასამართლომ „რუსთავი 2“-ის სარჩელის გარდა, ეს ორი სარჩელი გააერთიანა და მათ განსახილველად გამწესრიგებელი სხდომა დანიშნა. „რუსთავი 2“-ის სარჩელი თაობაზე არანაირი ინფორმაცია არ იდო. უფრო მეტიც, ჩვენს წარმომადგენელს ეუბნებოდნენ, რომ სარჩელი ჯერ დარეგისტრირებული არ იყო. შემდგომ აღმოჩნდა, რომ სარჩელი დარეგისტრირებული იყო. სარჩელი, რომელიც იმავე საკითხს ეხებოდა, უფრო ადრე და უფრო გვიან შეტანილ სარჩელებთან არ გააერთიანეს“, - აცხადებს ხმალაძე.
კანონმდებელის ცნობით, მრავალი წლის განმავლობაში, ამ ორ მოსამართლეს ნიკა გვარამიასთან ძალიან მჭიდრო ურთიერთობა ჰქონდათ.
„ერთ-ერთი მათგანი იყო მისი მოადგილე, როდესაც ის იუსტიციის მინისტრი გახლდათ. შემდგომ მისი მოადგილე იყო, როცა გვარამია განათლების მინისტრი გახლდათ. წლების განმავლობაში, კოლეგიის თავმჯდომარე მოსამართლე იუტიციის მინისტრის მოადგილე იყო. იყვნენ ერთი და იმავე პოლიტიკური გუნდის წევრები. შესაძლოა, ეს ამანაც განაპირობა. საინტერესოა, როგორ მოხდა სხვადასხვა მოსარჩელეების მიერ წარდგენილი სარჩელების განხილვა?!“, - განაცხადა ხმალაძემ.
საქართველოს პარლამენტმა საკონსტიტუციო სასამართლოს მოსამართლეების აცილების შუამდგომლობით მიმართა.
