პარლამენტის ადამიანის უფლებათა დაცვის კომიტეტის თავმჯდომარის, ეკა ბესელიას განცხადებით, საკონსტიტუციო სასამართლოს მიმართ კითხვები ისმის, რის გამოც, სასამართლო პასუხისმგებელია, მის მიუკერძოვებლობასთან დაკავშირებით საზოგადოებაში კითხვები არ დატოვოს.
როგორც ჟურნალისტებს ბესელიამ განუცხადა, საკონსტიტუციო სასამართლო უპრეცედენტოდ გააქტიურებულია.
მისი თქმით, კარგია, რომ სასამართლო ასეთი ტემპით ამუშავდა, რადგან საკმაოდ დიდი ხანი ის ძალიან ნელი და მდორე იყო.
„ამ სასამართლოს მუშაობის დინამიკას ვერ ვხედავდით, ახლა კი, ის შთამბეჭდავად სწრაფია, რაც ბევრი კითხვის მატარებელია. მთავარია, რომ სასამართლო საკუთარი გადაწყვეტილებებით კითხვებს არ ტოვებდეს - ის არის მიუკერძოვებელი და არაობიექტური თუ არა. სასამართლომ ყველაფერი უნდა გააკეთოს, რომ ეს კითხვები არ დარჩეს. კონკრეტული გადაწყვეტილების შეფასებას არ მოვახდებ, რადგან პატივს კონსტიტუციას ვცემ, მაგრამ ყველა იმ გადაწყვეტილების დასაბუთება მაინტერესებს, რომელიც ამა თუ იმ საკითხს დაედება. საკონსტიტუციო სასამართლოს ძალიან მაღალი სტანდარტი მოეთხოვება და მან უზადოდ და უშეცდომოდ მიღებული გადაწყვეტილებები უნდა აჩვენოს,“, - განაცხადა ბესელიამ.
„ეროვნული ბანკის შესახებ“ კანონში ცვლილებები დეპუტატებმა ნოდარ ებანოიძემ და თამაზ მეჭიაურმა მოამზადეს, რომლის მიხედვითაც, ეროვნული ბანკის დაქვემდებარებიდან ფინანსური ზედამხედველობის სააგენტო გამოვიდა. პარლამენტის მიერ მიღებულ კანონპროექტს პრეზიდენტ გიორგი მარგველაშვილმა ვეტო დაადო, რომელიც უმრავლესობა სექტემბერში დაძლია, უმცირესობამ და „თავისუფალმა დემოკრატებმა“ კი საკონსტიტუციო სასამართლოს მიმართეს.
საკონსტიტუციო სასამართლომ ეროვნული ბანკის შესახებ სარჩელი წარმოებაში მიიღო და საფინანსო ზედამხედველობის სააგენტოს მუშაობა შეაჩერა.
