აშშ-მა და ევროპულმა ქვეყნებმა ოკუპირებულ ტერიტორიებზე მცხოვრები პირებისთვის ვიზების გაცემის პოლიტიკა გაამკაცრეს, - განაცხადა საქართველოს საგარეო საქმეთა მინისტრის მოადგილემ, დავით დონდუამ „თავისუფალი დემოკრატების“ ფრაქციის სხდომაზე.
მინისტრის მოადგილის ინფორმაციით, 2010 წლიდან, ამერიკელებმა რუსულ პასპორტებში ამერიკული ვიზების ჩარტყმა დაიწყეს განურჩევლად იმისა, სად იყო გაცემული პასპორტი - რუსეთში თუ ოკუპირებულ ტერიტორიებზე, თუმცა ახლა ეს გამკაცრებულია.
„გარკვეულ შედეგებს უკვე ვხედავთ თუნდაც იმ მხრივ, რომ კიდევ უფრო გაამკაცრეს სავიზო რეჟიმი და კიდევ უფრო მკაცრად ეკიდებიან პასპორტების თემას, რომელზეც ყურადღება მოდუნებული ჰქონდათ. ბოლო ექვსი თვეა, რაც ამერიკელებმა და ბევრმა ევროპულმა ქვეყანამ ეს პოლიტიკა გაამკაცრეს. ეს სწორედ იმის გამო მოხდა, რომ იგივე პრობლემა უკრაინაში შეიქმნა, რაც საქართველში იყო. ამ მხრივ, ამის თქმა როგორ შეიძლება, მაგრამ უკრაინის კრიზისი ჩვენი საკითხის წარმოჩენაში დაგვეხმარა. ყველა შეხვედრაზე იმას ვამბობთ, რომ ის რაც უკრაინაში, საქართველოსა და მოლდოვაში ხდება, იზოლირებული მოვლენები არ არის და ერთი დიდი სცენარის ნაწილია, რომელსაც კომპლექსური მიდგომა სჭირდება“, - განაცხადა დონდუამ.
