თუ სამ-ოთხ წელიწადში აფხაზეთში არაფერი გაკეთდა, ლეგალური თვალსაზრისით, ყირიმს მივიღებთ, - განაცხადა „თავისუფალი დემოკრატების“ ფრაქციის სხდომაზე საქართველოს საგარეო საქმეთა მინისტრის მოადგილემ, დავით დონდუამ.
მინისტრის მოადგილე ამბობს, რომ რუსეთმა ე.წ. სამხრეთ ოსეთსა და დე-ფაქტო აფხაზეთში ე.წ. ხელშეკრულებები გააფორმა, რაც ფაქტობრივად, ანექსიას ნიშნავს.
„ზამთარში, რუსეთმა ე.წ. სამხრეთ ოსეთსა და დე-ფაქტო აფხაზეთში ე.წ. ხელშეკრულებები გააფორმა, რომელიც ქვემდებარე დოკუმენტების გაფორმებას ითვალისწინებს და ეს დოკუმენტები უკვე ფორმდება. ეს ყველაფერი მიმართულია იქითკენ, რომ სამ წელიწადში ეს ტერიტოროები შეწოვილი იქნეს რუსეთის სამართლებრივ სივრცეში, რაც ფაქტობრივად, ანექსიას ნიშნავს. თუკი სამ-ოთხ წელიწადში აფხაზეთში არაფერი გაკეთდა, ლეგალური თვალსაზრისით, ყირიმს მივიღებთ. ამიტომ ყველას მოვუწოდებთ, რომ როდესაც ლაპარაკია უკრაინაზე, ეს არ განიხილონ იზოლირებულ შემთხვევად, არამედ მხედველობაში ყოველთვის საქართველო ჰქონდეთ“,- დასძინა დონდუამ.
