აშშ-ის პრეზიდენტმა ბარაკ ობამამ ორგანიზაციის ”ექიმები საზღვრებს გარეშე” პრეზიდენტს ჯოან ლიუს კუნდუზის საავადმყოფოს დაბომბვის გამო ბოდიში პირადად მოუხადა. ამის შესახებ Reuters-ი თეთრი სახლის პრეს-მდივნის ჯოშ ერნესტზე დაყრდნობით იტყობინება.
პრეს-მდივნის თქმით, სატელეფონო საუბრისას ობამამ ლიუ დაარწმუნა, რომ აშშ-ის ხელისუფლება უზრუნველყოფს ინციდენტის ფაქტებისა და გარემოებების ”გამჭვირვალე, საფუძვლიან და მიუკერძოებელ გამოძიებას”.
მანამდე პენტაგონის ხელმძღვანელმა ეშტონ კარტერმა განაცხადა, რომ პენტაგონმა კუნდუზის ჰოსპიტალს ავიადარტყმები შეცდომით მიაყენა.
კუნდუზის საავადმყოფო ავიაიერიშების შედეგად 3 ოქტომბერს დაზიანდა. დაიღუპა 22 ადამიანი, მათ შორის ორგანიზაციის ”ექიმები საზღვრებს გარეშე” თანამშრომლებიც.
