რუსეთის პრეზიდენტის განცხადებით, დიდი შეცდომა იყო სირიის პრეზიდენტთან, ბაშარ ალ-ასადთან თანამშრომლობაზე უარი. გაეროს გენერალური ასამბლეაზე სიტყვით გამოსვლისას ვლადიმერ პუტინმა განაცხადა, რომ ასადი ერთადერთი ძალა იყო, რომელიც ებრძოდა ,,ისლამური სახელმწიფოს” ექსტრემისტებს სირიაში.
პუტინმა დასავლეთი გააკრიტიკა „ზომიერი“ მეამბოხეებისთვის იარაღის მიწოდებისთვის. მისი თქმით, ადამიანებს წვრთნიან, იარაღს აძლევენ და შემდეგ ისინი ისლამურ სახელმწიფოს რიგებში აღმოჩნდებიან ხოლმე.
პუტინმა განაცხადა, რომ რუსეთი, რომელიც ახლა გაეროს უშიშროების საბჭოს მორიგე თავმჯდომარეა, შეეცდება, შეთანხმება მოხდეს რეზოლუციის გარშემო, რომლის მიზანი იქნება, კოორდინაცია სირიაში ექსტრემისტებთან დაპირისპირებულ ყველა ძალას შორის.
რუსეთის პრეზიდენტის სიტყვით გამოსვლისას, უკრაინის დელეგაციამ დარბაზი დატოვა.
მანამდე კი, გაერო-ს მდგრადი განვითარების სამიტზე უკრაინის პრეზიდენტის, პეტრო პოროშენკოს სიტყვით გამოსვლისას დარბაზი გაერო-ში რუსეთის მუდმივმა წარმომადგენელმა, ვიტალი ჩურკინმა დატოვა.
